मुंबई : राज्यातील आरोग्य विज्ञान पदवी अभ्यासक्रमांच्या प्रवेशामध्ये लागू असलेली 70: 30 ही प्रादेशिक आणि राज्यस्तरीय कोटा कार्यपद्धत रद्द करण्यात येत असल्याची घोषणा वैद्यकीय शिक्षण मंत्री अमित देशमुख यांनी विधिमंडळाच्या दोन्ही सभागृहात केली. यापुढे ‘वन महाराष्ट्र, वन मेरिट’ अशी वैद्यकीय प्रवेश प्रक्रिया असेल, असेही त्यांनी सांगितले.
उर्वरित महाराष्ट्र, मराठवाडा आणि विदर्भ या प्रादेशिक विभागांपैकी ज्या विभागातून उमेदवार 12 वी उत्तीर्ण झालेला असेल त्या उमेदवारांसाठी त्यांच्या संबंधित प्रादेशिक विभागातील महाविद्यालयामध्ये 70 टक्के जागा राखीव असत. तर 30 टक्के जागा या संपूर्ण राज्यातील उमेदवारांसाठी उपलब्ध असत. हा 70:30 चा निर्णय यापूर्वी घेण्यात आला होता.
तुमच्या हक्काचे ‘सुराज्य डिजिटल’ फेसबुक पेज, ट्विटर, शेअरचॅट आणि ‘टेलिग्राम’वरही उपलब्ध
70:30 कोटा पध्दतीमुळे गुणवत्ताधारक विद्यार्थी प्रवेशापासून वंचित राहत असल्याने कोटा पद्धत रद्द करण्याचा शासनाने निर्णय घेतला असून प्रवेश नियमामध्ये बदल करण्याकरिता 4 सप्टेंबर रोजी अधिसूचना जारी करण्यात आली आहे.
* पसंतीच्या महाविद्यालयातील प्रवेश मिळत नव्हता
तीनही प्रादेशिक विभागामध्ये महाविद्यालयांची संख्या आणि पर्यायाने प्रवेशासाठी उपलब्ध जागांची संख्या भिन्न होत्या. त्यामुळे मराठवाड्यासारख्या प्रादेशिक विभागामध्ये जेथे महाविद्यालयांची संख्या कमी आहे, तेथील विद्यार्थ्यांना 70 टक्के प्रादेशिक जागांमध्ये कमी जागा उपलब्ध होत होत्या. साहजिकच उच्च गुणवत्ता असूनही तेथील उमेदवारांना त्यांच्या पसंतीच्या महाविद्यालयात प्रवेश मिळत नव्हता. तर काही विद्यार्थ्यांना प्रवेशास मुकावे लागत होते. त्यामुळे 70: 30 ही कोटा पद्धती रद्द करण्याची वारंवार मागणी होत होती.
