अमरावती, 5 जून (हिं.स.)।
अमरावती जिल्ह्यातील धारणी तालुक्यासह अकोला आणि बुलढाणा जिल्ह्यांच्या उत्तर भागात बुधवारी रात्री ९:५७ वाजता भूकंपाचे सौम्य धक्के जाणवले. रिश्टर स्केलवर यांची नोंद ३.८ इतकी करण्यात आली आहे. भूकंपाचा केंद्रबिंदूच्या शिवझिरी अमरावती जिल्ह्यातील धारणी नजीकच्या आणि मध्य प्रदेशातील मेळघाट पर्वतरांगेत जमिनीपासून १० किलोमीटर खाली होता, असे एनसीएसच्या रिपोर्टमध्ये म्हटले आहे. अमरावती जिल्हा प्रशासनाने देखिल या घटनेला दुजोरा दिला असून कुठल्याही प्रकारची हानी झाली नसल्याचे म्हटले आहे.
धारणी तालुक्यातील काही गावांमध्ये बुधवारी रात्री ९.५७ वाजता ३.८ रिक्टर स्केलचा सौम्य स्वरुपाचा भूकंप झाल्याची नोंद राष्ट्रीय भूकंपविज्ञान केंद्रांत झालेली आहे. प्रत्यक्षात या गावांमधील नागरिकांना कुठल्याही स्वरुपाचे धक्के जाणवले नसल्याची माहिती धारणीचे तहसीलदार प्रदीप शेवाळे यांनी दिलीधारणी तालुक्यातील शिवझिरी हे भूकंपाचे केंद्र असल्याचे ‘एनसीएस’च्या रिपोर्टमध्ये नमूद आहे व या लगतच्या सुसर्दा, राणीगाव, डाबला, नारदू या गावांच्या परिसरात सौम्य स्वरुपाचा भूकंप झाल्याची माहिती निवासी उपजिल्हाधिकारी अनिल भटकर यांनी दिली. त्यांनी याबाबत धारणी तहसीलदारांना याबाबत माहिती दिली व या गावांमध्ये तलाठी, मंडळ अधिकारी यांची चमू पाठविण्यात आली. शिवाय तहसीलदार शेवाळे यांनी या गावांमधील काही नागरिकांशी संपर्क केला असता, कुठल्याही स्वरुपाचा धक्का जाणवला नसल्याचे त्यांनी सांगितले. जिल्ह्यात अप्पर वर्धा धरणावरील भूकंपमापक यंत्र कित्येक वर्षांपासून बंद आहे. या यंत्राची दुरुस्ती अद्याप करण्यात आलेली नसल्याचे वास्तव आहे.
—————
