अमरावती, 29 मार्च (हिं.स.) : कर संकलन व कर आकारणी विभाग अमरावती शहर महानगरपालिका मध्‍य झोन क्र.२ राजापेठ यांच्या वतीने विविध सुट योजना देऊनही काही थकबाकीदार टॅक्स भरणा करण्यास टाळाटाळ करीत आहेत. त्यांच्यावर मनपा मध्‍य झोन क्र.२ राजापेठ मार्फत धडक जप्ती मोहीम राबविण्यात येत आहे. त्यानुसार क्षेत्रीय कार्यक्षेत्रामध्‍ये मालमत्ता कराच्‍या वसूलीसाठी नियुक्‍त करण्‍यात आलेल्‍या वसूली पथकामार्फत कार्यवाही करण्‍यात आली आहे. आज दिनांक २८ मार्च,२०२५ रोजी सहाय्यक क्षेत्रीय अधिकारी नर्मदा चव्हाण यांच्या नेतृत्‍वात मनपा मध्‍य झोनच्‍या पथकामार्फत वार्ड B-९, मालमत्ता क्र. ४८६/३९, थकीत मालमत्ता कर रु.१,४५,३६७/- असून सदर मालमत्‍तेवर जप्ती व सीलची कार्यवाही करण्‍यात आली.
या पुढेही थकीत कराच्‍या वसूलीसाठी नियुक्‍त पथकामार्फत जप्‍तीची कार्यवाही तिव्र करण्‍यात येणार असून सदर कार्यवाही अंतर्गत मालमत्ता सील करणे, आटकाव करणे इत्‍यादी कार्यवाही करण्‍यात येणार असून मालमत्ता जप्‍त किंवा सील करून मुदतीमध्‍ये मालमत्ताधारकांनी कर भरणा न केल्‍यास अशा मालमत्ताधारकांच्‍या मालमत्‍तेचा लिलाव, विक्री करून कर वसूल करण्‍यात येणार आहे. तरी व्‍याज, शास्‍ती माफी योजनेचा लाभ घेऊन आपल्‍याकडे देय असलेल्‍या कराचा भरणा करावा व जप्‍तीसारखी कटू कार्यवाही टाळावी, असे आवाहन महानगरपालिका आयुक्‍त सचिन कलंत्रे यांनी केले आहे. या कारवाईत निरीक्षक गजेंद्र हर्षे, मालमत्ता कर वसुली लिपिक रोशन चव्हाण, धरम बीवाड समय दुलगज उपस्थित होते.
