मुंबई : महाविकास आघाडी सरकारच्या नेते आणि आमदारांना एकापाठोपाठ ईडीच्या नोटीस मिळाल्यामुळे अखेर शिवसेना आता आपल्या जुन्या अवतारात रस्त्यावर उतरली आहे. आज शिवसैनिकांनी थेट ईडीच्या कार्यालयावर भाजपचे बॅनर लावून एकच दणका उडवून दिला आहे. शिवसैनिकाच्या या कृत्यामुळे एकच खळबळ उडाली आहे.
शिवसेनेचे आमदार प्रताप सरनाईक आणि त्यांच्या कुटुंबीयाला ईडीने नोटीस बजावली. त्यांची चौकशी सुरू आहे. त्यानंतर शिवसेनेचे खासदार संजय राऊत यांच्या पत्नी वर्षा राऊत यांनाही नोटीस पाठवण्यात आल्यामुळे एकच खळबळ उडाली. एकीकडे संजय राऊत यांनी नोटीसीवरून भाजपवर जोरदार हल्लाबोल केला आहे. तर दुसरीकडे शिवसैनिकांनी मुंबईतील ईडीच्या कार्यालयाचे नावच बदलून टाकले आहे. ईडीच्या कार्यालयावर हे ‘भाजप प्रदेश कार्यालय’असं सांगत बॅनरच लावले आहे. शिवसैनिकाच्या या कृत्यामुळे एकच खळबळ उडाली आहे.
तर दुसरीकडे शिवसेनेचे खासदार संजय राऊत यांनी पत्रकार परिषद घेऊन ईडी आणि भाजपवर गंभीर आरोप केले आहे.
तुमच्या हक्काचे ‘सुराज्य डिजिटल’ फेसबुक पेज, ट्विटर, कू ॲपवर आणि ‘टेलिग्राम’वरही उपलब्ध
माझ्या पत्नीने तिच्या मैत्रीणीच्या मदतीने घर घेण्यासाठी दहा वर्षांपूर्वी 50 लाखांचं कर्ज घेतलं होतं. हे दहा वर्षांपूर्वीचं प्रकरण आहे. त्यासाठी नोटीस आलीय. दहा वर्षानंतर ईडीला जाग आली आहे, असं संजय राऊत यांनी सांगितले.
गेल्या दीड महिन्यांपासून ईडीने आमच्याशी पत्रव्यवहार केला आहे. त्यांना काही कागदपत्रं हवी होती. आम्ही वेळोवेळी ही कागदपत्रं दिली आहेत, असं सांगतानाच ईडीने चौकशीचा संदर्भ नोटीशीत दिला नाही. मग पीएमसी बँकेचा विषय आला कुठून? भाजपची माकडं पीएमसी बँकेचा मुद्दा का लावून धरत आहेत? पीएमसी बँकेप्रकरणी चौकशी होणार असल्याचं यांना कुणी सांगितलं? ईडीने भाजपच्या कार्यालयात त्यांचं कार्यालय थाटलं आहे का? असा सवाल संजय राऊतांनी उपस्थित केला. तर दुसरीकडे ईडी कार्यालयावरच भाजपाचे प्रदेश कार्यालयाचा बॅनर झळकवला.
