लंडन , 17 एप्रिल (हिं.स.)।टाइम मॅगझीनने २०२५ मधील जगातील सर्वात १०० प्रभावशाली व्यक्तींची यादी नुकतीच जाहीर केली आहे. या यादीत अमेरिकेचे अध्यक्ष डोनाल्ड ट्रम्प यांच्यापासून ते बांगलादेशच्या अंतरिम सरकारचे मुख्य सल्लागार मोहम्मद युनूस यांच्यापर्यंत अनेकांची नावे आहेत. मात्र, या यादीत एकाही भारतीयाचं नाव नसल्याचं पाहून आश्चर्य व्यक्त केलं जात आहे.
यावेळी या यादीत एकाही भारतीयाचा समावेश नाही. टाइम मासिकाच्या याआधीच्या वर्षांमधील प्रभावशाली व्यक्तींच्या याद्यांमध्ये पंतप्रधान नरेंद्र मोदींसह अनेक भारतीयांचा समावेश केला जात होता. मात्र, यंदा टाइमने एकाही भारतीयाची दखल घेतलेली दिसत नाही. यंदाच्या यादीत ट्रम्प यांच्यासह टेस्ला, स्पेसएक्स व एक्सचे मालक तथा जगातील सर्वात श्रीमंत व्यक्ती एलॉन मस्क देखील आहेत.याशिवाय, बांगलादेशातील अंतरिम सरकारचे प्रमुख मोहम्मद युनूस यांनाही या यादीत स्थान मिळाले आहे. खरे तर, या यादीत दरवर्षी एका तरी भारतीयाचे नाव असते. २०२४ मध्ये, बॉलिवूड अभिनेत्री आलिया भट्ट आणि ऑलिंपिक कुस्तीगीर साक्षी मलिक यांचा या यादीत समावेश होता.
मात्र, या वर्षी या यादीत एकही भारतीय नाही. त्यामुळे अनेकांनी यावर आश्चर्य व्यक्त केलं आहे. २०२५ ची टाइमची १०० सर्वात प्रभावशाली व्यक्तींची यादी तीन श्रेणींमध्ये विभागण्यात आली आहे. त्यांना लीडर्स, टायटन्स, आयकॉन्स अशी नावे देण्यात आली आहेत. या यादीतील ‘लीडर्स’ श्रेणीत ब्रिटनचे पंतप्रधान कीर सार्मर, शांततेचं नोबल मिळालेले मोहम्मद युनूस, अमेरिकेचे उपाध्यक्ष जे. डी. व्हॅन्स यांचा समावेश आहे. भारतीय वंशाच्या रेश्मा केवलरामणी यांना या यादीत स्थान मिळाले आहे. मात्र त्या भारतीय नागरिक नाही.
केवलरामणी सध्या व्हर्टेक्स या औषध कंपनीच्या सीईओ आहेत. त्या जेव्हा अमेरिकेला गेल्या तेव्हा केवळ ११ वर्षांच्या होत्या. आता त्या अमेरिकेतील एका प्रसिद्ध बायोटेक्नॉलॉजी कंपनीच्या सीईओ आहेत. भारतासोबतच चीनचे राष्ट्रपती शी जिनपिंग आणि रशियन राष्ट्रपती व्लादिमीर पुतिन यांसारख्या दिग्गजांचाही समावेश नाही. याशिवाय, फ्रान्स आणि जर्मनी सारख्या शक्तिशाली युरोपीय देशांच्या नेत्यांनाही यात स्थान देण्यात आलेले नाही. याचे कारण म्हणजे, टाईम मॅगझिनच्या प्रभावशाली व्यक्तींच्या यादीत केवळ अशाच नेत्यांना स्थान दिले जाते, जे अलिकडेच समोर आले आहेत आणि ज्यांच्या येण्याने समाजावर काही प्रभाव पडला आहे.
