मुंबई : आपल्या राज्यात कोरोनाचे सर्वाधिक रुग्ण आढळत आहेत. त्यामुळे आता राज्य सरकारकडून पुन्हा लॉकडाऊन करण्याच्या दृष्टीने पावले उचलली जात असल्याचे संकेत आहेत. महाराष्ट्र भाजपाचे प्रदेशाध्यक्ष चंद्रकांत पाटील यांनी या लॉकडाऊनला विरोध दर्शवला असून राज्य सरकारने हातावर पोट असलेल्या साधारण एक कोटी नागरिकांना प्रत्येकी पाच हजार द्यावेत व नंतर लॉकडाऊनबाबत निर्णय घ्यावा, असे म्हटले आहे.
एक वर्ष लोक कसे जगले हे ‘मातोश्री’मध्ये राहून समजणार नाही, असा टोमणा चंद्रकांत पाटील यांनी मुख्यमंत्री उद्धव ठाकरेंना मारला. ते म्हणालेत, “पूर्वी राजा वेश बदलून वस्त्यांमध्ये फिरायचा तसे फिरावे लागेल. तुम्ही मुख्यमंत्री म्हणून फिरला की तुमच्यासोबत ताफा असेल. त्यामुळे लोक तुमच्याशी मनमोकळं बोलणार नाहीत.
राज्यामध्ये रात्री ८ ते सकाळी ७ जमावबंदीचे आदेश लागू करण्यावरूनही पाटील यांनी राज्याचे पर्यटनमंत्री आणि उद्धव ठाकरेंचे पुत्र आदित्य ठाकरेंना टोमणा मारला. “आता नाईट कर्फ्यू लागू केला. ते आम्हाला मान्य आहे. रात्री कोणाला फिरायचे असते? ज्यांना फिरायचे असते ते तुमच्यासोबत असतात. त्यांना नाईट लाईफ हवे असते. सर्वसामान्यांना नाईट लाईफ नको, त्यांना सातच्या आत घरात चालते.
* लॉकडाऊनबाबत भाजप, राष्ट्रवादीची भूमिका
– भाजपची भूमिका – मातोश्रीवर बसून सर्वसामान्यांचा त्रास कसा कळणार. राज्य सरकार जनतेला एक रुपयाचाही दिलासा न देता, लॉकडाऊन लावणार असेल तर आम्ही ते खपवून घेणार नाही.
– राष्ट्रवादीची भूमिका – लॉकडाऊन हा पर्याय राज्याला आणि जनतेला परवडणारा नाही. त्याऐवजी आरोग्य सुविधा वाढवण्यावर भर देण्यात यावा, अशी आग्रही भूमिका आम्ही मुख्यमंत्र्यांकडे मांडली आहे.
