तेहरान , 16 जून (हिं.स.)।इराण आणि इस्रायलमधील तणाव सतत वाढत आहे. दोन्ही देश एकमेकांवर क्षेपणास्त्रे डागत आहेत.यातच इराणकडून एक मोठा दावा करण्यात आला होता. जर इस्रायलने आमच्यावर अणुहल्ला केला, तर पाकिस्तान आपल्याला सहकार्य करेल आणि इस्रायलवर अणु हल्ला करेल. असा दावा इराणने केला होता. मात्र एक वृत्तानुसार, पाकिस्तानने हा दावा फेटाळला आहे.
पाकिस्तान आपल्यासोबत आहे आणि अणु हल्ल्याच्या बाबतीत आपल्याला मदत करेल, असा दावा इस्लामिक रिव्होल्यूशनरी गार्ड कॉर्प्स (आयआरजीसी)चे वरिष्ठ जनरल मोहसेन रेजाई यांनी एका मुलाखतीत केला होता. यानंतर,पाकिस्तानचे संरक्षणमंत्री ख्वाजा आसिफ यांनी इराणचा हा दावा चुकीचा असल्याचे म्हटले आहे. ”इस्लामाबादने अशा प्रकारचे कसलेही विधान केलेले नाही,” असे आसिफ यांनी म्हणाले आहे.
इराण आणि इस्रायल यांच्यातील तणाव शिगेला फोहोचला असतानाच एक धक्कादायक वृत्त समोर आले आहे. यानुसार, इराणचे सुप्रीम लीडर अयातुल्लाह अली खामेनेई अपल्या संपूर्ण कुटुंबासह बंकरमध्ये लपून बसले असल्याचे वृत्त इराणी माध्यमांनी दिले आहे. काही वृत्तांमधून दावा करण्यात आला होता की, इस्रायलने खामेनेई यांच्यावर अटॅकची संपूर्ण योजना आखली होती. ही योजना अमेरिकेचे अध्यक्ष डोनाल्ड ट्रम्प यांच्या समोरही मांडण्यात आली होती. मात्र ट्रम्प यांनी याला नकार दिला. यावर इस्रायलचे पंतप्रधान बेंजामिन नेतान्याहू यांनी मौन बाळगले आहे.
