राजेश कदम
पंढरपूर :
सोलापूर जिल्ह्यात गेल्या दोन वर्षांपासून द्राक्ष आणि बेदाण्याच्या दरामध्ये सातत्याने पडझड होत होती. मात्र यंदा बेदाण्याचे उत्पन्न कमी झाल्याने बेदाण्याला चढा भाव मिळू लागला आहे. पंढरपूर कृषी उत्पन्न बाजार समितीमध्ये पंढरपूर तालुक्यातील जाधववाडी येथील नवनाथ कोरडे या शेतकर्‍याच्या बेदाण्याला मंगळवारी विक्रमी 651 रुपयांचा दर मिळाला आहे. हा दर महाराष्ट्रातला विक्रमी दर मानला जात आहे.
यावर्षी द्राक्षाचे उत्पन्न जवळपास 50 टक्के घटल्याने बेदाणेही खूप कमी प्रमाणात तयार झाले आहेत. सर्वसाधारण गोल बेदाण्याला अडीचशे रुपयापर्यंतचा दर मिळत असून व्यवस्थित पद्धतीने निवडून आणलेल्या लांब बेदाण्याला विक्रमी भाव मिळू लागला आहे. पंढरपूर बाजार समितीत नवनाथ कोरडे यांनी आणलेला बेदाणा हा जवळपास एक ते दीड इंच लांबीचा असून पूर्णपणे वाळलेला आणि अतिशय चांगला रंग असलेला या बेदाण्याला चक्क 651 रुपये प्रति किलो एवढा विक्रमी भाव मिळाला आहे.
बाजार समितीतील व्यापारी विशाल मर्दा यांच्याकडे कोरडे यांनी आपला बेदाणा विक्रीसाठी आणला होता. मंगळवचारी झालेल्या लिलावात सांगलीच्या सारडा या व्यापार्‍यांनी कोरडे यांचा बेदाणा 651 रुपये एवढ्या विक्रमी दराने खरेदी केला आहे. यावेळी बोलताना शेतकरी नवनाथ कोरडे यांनी बागेत संपूर्ण घरदार राबवत असल्याने इतका चांगला दर मिळाल्याबद्दल समाधान व्यक्त केले. यावेळी बाजार समिती व व्यापार्‍यांच्या वतीने नवनाथ कोरडे यांचा सत्कार करण्यात आला.
यावर्षी बेदाण्याचे उत्पन्न कमी शेतकर्‍यांनी प्रति एकर उत्पन्नापेक्षा कॉलिटीवर लक्ष दिल्यास आणि बेदाणा निवडताना ग्रेडिंग मशीन ऐवजी माणसांचा वापर केल्यास चांगल्या प्रतीचा बेदाणा निघू शकेल, अशी अपेक्षा व्यापारी विशाल मर्दा यांनी व्यक्त केली आहे. तर यावर्षी बेदाण्याचे उत्पन्न कमी असल्याने शेतकर्‍यांना या सीझनमध्ये अतिशय चांगले दर मिळतील असे सांगताना आज भारतातही व्यापार्‍यांकडे 25 टक्क्यांपेक्षा कमी बेदाणा असल्याने हा संपूर्ण सीजन शेतकर्‍यांना जास्तीचे पैसे मिळवून देणारा असेल असे व्यापारी सारडा यांनी सांगितले. दरम्यान,
यावर्षी बदलत्या वातावरणाचा द्राक्ष उत्पादक शेतकर्‍यांना मोठा फटका बसला आहे. अनेक शेतकर्‍यांच्या द्राक्ष उत्पादनात घट झाली आहे. त्यामुळं यावर्षी द्राक्ष आणि बेदाण्याला चांगले दर राहतील असा अंदाज वर्तवण्यात येत आहे. पंढरपूरची नेहमीच आघाडी बेदाणा लिलावात पंढरपूर मार्केट कमिटी आघाडीवर असते.प.महाराष्ट्रातील सर्व जिल्ह्यांमधून बेदाणा याठिकाणी लिलावास येत असतो.त्यामुळे तिथे किती आणि कसा भाव मिळतो,याकडे प.महाराष्ट्रातील द्राक्ष उत्पादकांचे लक्ष लागून असते आता सोलापुरातही बेदाणाचे लिलाव सुरू झाले आहेत.
