मुंबई : पंतप्रधान नरेंद्र मोदी यांनी परदेशातून काळा पैसा परत आणून १५ लाख देऊ हे आश्वासन मात्र आता वेगळ्याच पद्धतीने पूर्ण केले आहे. केवळ काळ्या पैशांऐवजी परदेशातून कोरोना आणून देशाला १५ लाख कोरोनाचे रुग्ण दिले व भारताला जगाच्या नकाशावर मानाचे स्थान दिले, त्याबद्दल प्रदेश काँग्रेसतर्फे आम्ही मोदी यांचे हार्दिक अभिनंदन करतो, अशी उपरोधिक टीका महाराष्ट्र प्रदेश काँग्रेस कमिटीचे सरचिटणीस व प्रवक्ते सचिन सावंत यांनी केली आहे.
तुमच्या हक्काचे ‘सुराज्य डिजिटल’ फेसबुक पेज, ट्विटर, शेअरचॅट आणि ‘टेलिग्राम’वरही उपलब्ध
सहा वर्षांपूर्वी सत्तेवर येण्यासाठी नरेंद्र मोदी यांनी जनतेला भरमसाठ आश्वासने दिली होती. त्यातील एकही आश्वासन त्यांनी अद्याप पूर्ण केले नाही. परंतु, त्यांनी हे आश्वासन कोरोनाची संख्या १५ लाख पूर्ण करुन केल्याची टीका केली. भाजपचे महाराष्ट्रातील नेते महाराष्ट्र विकास आघाडी सरकारला कोरोनाच्या संदर्भात तुम्ही काय केले? हा प्रश्न विचारत आहेत. पंतप्रधान मोदी आणि त्यांच्या सहकाऱ्यांप्रमाणे आमची बौद्धीक क्षमता नसल्याने आम्ही आमच्या अल्पबुद्धीने वैज्ञानिक दृष्टीकोनातून योग्य वैद्यकीय उपचार, नविन रुग्णालयांची उभारणी, चाचण्यांची संख्या वाढवून चेस द वायरस सारखी प्रभावी कार्यपद्धती अंमलात आणली. ज्याची प्रशंसा आयसीएमआरने केली असून देशात हेच मॉडेल राबवले पाहिजे, असे म्हटले आहे.
धारावीमध्ये करोना नियंत्रणासाठी केलेल्या प्रभावी उपाययोजनांची जगभरातून वाहवा केली गेली आहे. परंतु भाजप नेत्यांच्या ते पचनी पडले नाही. त्यांच्या दृष्टीकोनातून आम्ही मोदी यांच्या अभिनव व अनोख्या उपचारपद्धती प्रमाणे थाळ्या वाजवायला हव्या होत्या, दिवे लावले पाहिजे होते म्हणजे कोरोना नेस्तनाबूत झाला असता, अशी टोलेबाजी सचिन सावंत यांनी केली.
पंतप्रधान मोदी यांच्या अनोख्या योजनांमुळे आणि कर्तबगारीमुळे कोरोना परदेशातून भारतात आलाच नाही तर आज कोरोना रुग्णसंख्येत भारत जगात तिसऱ्या क्रमांकावर असून पहिल्या क्रमांकाकडे वेगाने वाटचाल करत आहे. यातून भारताची कीर्ती पूर्ण विश्वात पसरली आहे. हे केवळ मोदींनी योग्य निर्णय योग्य वेळेला घेतले यामुळेच शक्य झाले आहे. यामागे निश्चितच मोदींच्या दूरदृष्टीचा आणि अभिनव कार्यपद्धतीचा हात आहे, असा टोला लगावत मोदी करोना विरोधातले युद्ध २१ दिवसांत जिंकणार होते परंतु प्रत्यक्षात करोनाच्या साथीने भारतीयांविरोधात युद्ध पुकारले आहे, अशी चिंता सचिन सावंत यांनी व्यक्त केली.
