पुणे, 28 जून (हिं.स.)।
धरणक्षेत्रातील पावसाचा जोर ओसरला असला, तरी ओढ्या-नाल्यांतून पाण्याची आवक सुरू असल्याने धरणातील पाणीसाठ्यात वाढ सुरू आहे. धरणसाखळीतील पाणीपातळी 12.84 टीएमसी म्हणजे 44.04 टक्क्यांवर गेली. पुणे शहर व जिल्ह्याला आठ महिने पिण्याचे पाणी पुरेल इतका साठा साखळीत जमा झाला आहे.
गेल्या 24 तासांत धरणसाखळीत 0.44 टीएमसी पाण्याची वाढ झाली. धरणसाखळीत 12.40 टीएमसी पाणी होते. खडकवासला जलसंपदा विभागाचे उपविभागीय अभियंता मोहन भदाणे म्हणाले की, प्रथमच जून महिन्यात धरणात समाधानकारक पाणीसाठा झाला आहे.
गेल्या वर्षी 26 जून रोजी धरणसाखळीत केवळ 3.53 टीएमसी पाणी होते. धरणक्षेत्रात सध्या पावसाळी वातावरण असल्याने चांगल्या पावसाची शक्यता आहे.
