पुणे, 18 एप्रिल (हिं.स.)। गर्भवती महिलेच्या मृत्यूप्रकरणात सर्वांचे लक्ष लागलेल्या ससून रुग्णालयाच्या अहवालामध्ये महिलेवरील उपचारावेळी हयगय झाली किंवा डॉक्‍टरांनी हलगर्जीपणा केला, असा उल्लेखच नसल्याची धक्कादायक माहिती पुढे आली आहे. ससूनच्या अहवालामध्ये मंगेशकर रूग्णालय व संबंधित डॉक्‍टरवर कडक कारवाई होण्याची शक्‍यता आता मावळली आहे. दरम्यान, संबंधित अहवालामुळे पुणे पोलिसही चक्रावले असून त्यांनी ससून रूग्णालयाकडे नव्याने अभिप्राय मागविला आहे.
ईश्‍वरी भिसे या ३७ वर्षीय गर्भवतीचा दोन जुळ्या मुलींना जन्म दिल्यानंतर उपचार सूरू असताना ३१ मार्च रोजी बाणेर येथील खासगी रूग्णालयात मृत्यू झाला होता. त्यापूर्वी २८ मार्च रोजी मात्र, भिसे यांना रक्तस्त्राव होत असल्याने त्या दीनानाथ मंगेशकर रुग्णालयात उपचारांसाठी दाखल झाल्या होत्या. त्यावेळी दीनानाथमधील स्त्रीरोगतज्ज्ञ डॉ. सुश्रुत घैसास यांनी नातेवाइकांकडे दहा लाख रुपयांची अनामत रकमेची लेखी मागणी केली होती. मात्र, नातेवाइकांनी तीन लाख रुपये भरण्याची तयारी दाखवली.
त्यानंतरही डॉ. घैसास यांनी दहा लाख रूपयांची मागणी लावून धरल्याने भिसे कुटुंबीय तेथून पाच तासानंतर बाहेर पडले. दीनानाथ मध्ये उपचारांना उशीर झाल्यामुळे ईश्‍वरी भिसे यांचा मृत्यू झाल्याचा आरोप करत नातेवाइकांनी अलंकार पोलिस ठाण्यात तक्रार दिली होती. त्या तक्रारीच्या आधारे अलंकार पोलिसांनी सर्व जबाब व उपचारांची कागदपत्रे ससूनच्या वैद्यकीय समितीकडे (मेडिकल बोर्ड) सादर केले होते.
