सोलापूर, 26 मे (हिं.स.)। कोकणातील दमटपणा गेल्या काही दिवसांपासून सोलापुरात अनुभवयाला मिळत होता. आता कोकणात जसा पाऊस येतो आणि लगेच जातोही, तसाच सेम पाऊसही सोलापुरात अनुभवायला येऊ लागला आहे. सोलापुरात सेम कोकणासारखा पाऊस आणि दमटपणा मे महिन्यात अनुभवायला मिळत आहे. सततच्या पावसाच्या हिरवाई नटली आहे. जिकडे-तिकडे पावसाच्या पाण्याची डबकी आणि चिखल झाला आहे.
सोलापुरच्या इतिहासातील सर्वात कमी २९.४ अंश सेल्सिअस कमाल तापमानाची नोंद झाल्यानंतर आजही सोलापुरच्या कमाल तापमानाचा पारा घसरला होता. आज सोलापुरात दिवसभर पावसाची रिमझिम, भुरभुर सुरू होती. ढगाळ वातावरण होते. सोलापुरात आज २८.६ अंश सेल्सिअस कमाल तापमानाची नोंद झाली आहे. मे महिन्याच्या इतिहासातील सोलापुरातील सर्वात कमी तापमानाची नोंद झाली आहे. ढगाळ वातावरण आणि अधून-मधून येणारा पाऊस यामुळे वातावरण अल्हाददायक झाले आहे.
