पुणे, 20 जून (हिं.स.)।
खडकवासला, टेमघर, वरसगाव आणि पानशेत या चार धरणांच्या पाणलोट क्षेत्रात झालेल्या पावसामुळे धरणांच्या पाणीपातळीत झपाट्याने वाढ होत आहे. गेल्या २४ तासांत चारही धरणांत मिळून १.७१ टीएमसीने पाणीसाठ्यात वाढ झाली आहे. खडकवासला धरण ८४ टक्के भरल्याने खबरदारीचा उपाय म्हणून सकाळी २ हजार क्युसेकने पाणी सोडण्यात आले. १५ हजार क्युसेकने नदीत पाणी सोडण्यात आले. यंदाच्या पावसाळ्यात खडकवासला धरणातून पाणी सोडण्यात सुरुवात झाली आहे.
पुणे, पिंपरी-चिंचवड शहरांसह जिल्ह्यात पुन्हा एकदा पावसाचा जोर वाढला असून, पहाटेपासून जोरदार सरी बरसल्या. पुणे शहराच्या विविध भागांमध्ये पाणी साचण्याचे तसेच काही ठिकाणी झाडपडीचे प्रकार घडले आहेत. शिवाय सकाळी कार्यालयांमध्ये निघालेल्या नोकरदारांना वाहतूक कोंडीचा फटका बसला. हलका पाऊस पडण्याची शक्यता हवामानशास्त्र विभागाने वर्तवली आहे. पुणे शहरात दिवसभरात सर्वाधिक पाऊस हा एनडीए परिसरात झाला असून, ३३.५ मिलिमीटरची नोंद झाली आहे.
पावसाचा जोर असल्यामुळे काही भागांतील सोसायट्यांमध्ये पाणी शिरल्याच्या घटना घडल्या. मागील चोवीस तासांत लवळे परिसरात ६४ मिलिमीटर, चिंचवडमध्ये ६०.५ मिलिमीटर पावसाची नोंद झाली आहे.
दरम्यान, मागील नऊ तासांत एनडीए, मगरपट्टा, शिवाजीनगर भागात पावसाचा जोर वाढल्याचे हवामान विभागाने सांगितले आहे.
