नवी दिल्ली, 20 ऑगस्ट – महाराष्ट्राचे राज्यपाल सी. पी. राधाकृष्णन यांना उपराष्ट्रपती पदाच्या निवडणुकीत सत्ताधारी महायुतीसोबतच विरोधी पक्षातील खासदारांनीही मतदान करावे, असे आवाहन रिपब्लिकन पक्षाचे राष्ट्रीय अध्यक्ष आणि केंद्रीय सामाजिक न्याय राज्यमंत्री रामदास आठवले यांनी केले.
आठवले म्हणाले की, प्रधानमंत्री नरेंद्र मोदी यांनी राधाकृष्णन यांची उपराष्ट्रपती पदासाठी एनडीए उमेदवार म्हणून निवड केल्याबद्दल ते त्यांचे आभारी आहेत. उमेदवारी अर्ज दाखल करताना पंतप्रधान मोदी यांच्यासह एनडीएचे वरिष्ठ नेते उपस्थित होते. त्या वेळी मोदींना भेटून राधाकृष्णन यांच्या निवडीबद्दल त्यांनी “जय महाराष्ट्र” म्हणत अभिनंदन केले.
राधाकृष्णन यांनी महाराष्ट्र, तमिळनाडू आणि देशभर महत्त्वाचे कार्य केले असून त्यांना सामाजिक प्रश्नांचा सखोल अभ्यास आहे. दलित, वंचित, आदिवासी आणि बहुजन वर्गासाठी त्यांनी चांगले काम केले असल्याचे आठवले यांनी नमूद केले. त्यांच्या प्रगल्भ सामाजिक जाणिवेमुळे आणि अनुभवामुळे ते उपराष्ट्रपती पदासाठी योग्य उमेदवार असल्याचेही त्यांनी सांगितले.
आठवले म्हणाले, “महाराष्ट्राचे राज्यपाल उपराष्ट्रपती पदासाठी निवडले जाणे हे अभिमानास्पद आहे. त्यामुळे पक्षभेद विसरून सर्व राजकीय पक्षांनी त्यांना मतदान करावे.”
