रत्नागिरी, 19 जून, (हिं. स.) : मनसेचे प्रमुख राज ठाकरे यांचा आदेश आणि पत्र घेऊन रत्नागिरी शहरातील शाळांमधील मुख्याध्यापकांची आज मनसे रत्नागिरीच्या शिष्टमंडळाने भेट घेऊन शाळा व्यवस्थापनाशी चर्चा केली आणि हिंदी शिकवण्यास विरोध करावा, असे निवेदन दिले.
पहिलीपासून तिसरी सक्तीची भाषा म्हणून “हिंदी” नकोच, या मनसे अध्यक्ष राज ठाकरेंच्या आदेशाची रत्नागिरीत अंमलबजावणी करण्यासाठी मनसे रत्नागिरी तालुकाध्यक्ष रूपेश जाधव, मनविसे जिल्हा अध्यक्ष गुरुप्रसाद चव्हाण, शहर संघटक अमोल श्रीनाथ या मुख्य पदाधिकाऱ्यांच्या नेतृत्वाखाली शाळा व्यवस्थापनांना निवेदन देण्यात आले.
त्यामध्ये शिर्के हायस्कूल, सॅक्रेड कॉन्व्हेन्ट हायस्कूल , पोद्दार स्कूल, विसपुते इंग्लिश मीडियम स्कूल आदी शाळांचा समावेश होता. या हिंदीसक्तीला मनसेबरोबरच मराठी माणूस म्हणून शिक्षक तसेच पालकांनीदेखील विरोध करावा, असे आवाहन करण्यात आले. यावेळी विभाग अध्यक्ष राहुल खेडेकर, सोम पिलनकर, रोहन शेलार , अॅड. माधवी पालकर व महाराष्ट्र सैनिक उपस्थित होते.
