लखनऊ, 28 मे (हिं.स.)।रॉयल चॅलेंजर्स बंगळुरूने मंगळावारी(दि. २७) इंडियन प्रीमियर लीग २०२५ स्पर्धेत दुसऱ्या क्रमांकावर हक्क सांगताना क्वालिफायर १ सामन्याचं तिकीट पक्कं केलं. बंगळुरूने लखनौ सुपर जायंट्स संघाला ६ विकेट्सने पराभूत केले.या विजयासह आता बंगळुरूचे १४ सामन्यानंतर ९ विजयांसह १९ गुण झाले असून पंजाब किंग्स पाठोपाठ ते दुसर्या क्रमांकावर आहेत.
या सामन्यात लखनौने बंगळुरूसमोर विजयासाठी २२८ धावांचे लक्ष्य ठेवले होते. या लक्ष्याचा पाठलाग बंगळुरूने १८.४ षटकात ४ विकेट्स गमावत २३० धावा करून पूर्ण केला. अमरावतीचा जितेश शर्मा बंगळुरूसाठी हिरो ठरला.त्याने कर्णधारपदाला शोभेल अशी दणदणीत अर्धशतकी खेळी केली. विराट कोहलीनेही अर्धशतक करत योगदान दिले. या विजयानंतर आता २९ मे रोजी बंगळुरूला पंजाब किंग्सविरुद्ध मुल्लनपूर येथे क्वालिफायर १ सामना खेळायचा आहे. दरम्यान, बंगळुरूने यशस्वी पाठलाग केलेले हे सर्वोच्च लक्ष्यही ठरले. याशिवाय आयपीएलमधील यशस्वी पाठलाग झालेले हे तिसऱ्या क्रमांकाचे सर्वोच्च लक्ष्य ठरले. त्यांनी राजस्थान रॉयल्सने पाठलाग केलेल्या २२४ धावांच्या लक्ष्याला मागे टाकले.
रॉयल चॅलेंजर्स बंगळुरूकडून फिल सॉल्ट आणि विराट कोहली यांनी सलामीला फलंदाजी करताना चांगली सुरुवात केली.पण ६ व्या षटकात फिल सॉल्टला आकाश महाराज सिंगने दिग्वेश राठीच्या हातून ३० धावांवर झेलबाद केले. त्यानंतर ७ व्या षटकाच्या पाचव्या चेंडूवर विल्यम ओरुर्कीने रजत पाटीदारला ७ चेंडूत १४ धावांवर बाद केले. विराटने २७ चेंडूत त्याचे यंदाच्या हंगामातील ८ वे अर्धशतक पूर्ण केले. विराटला अर्धशतकानंतर १२ व्या षटकात आवेश खानने बाद केले. लाँग ऑफला आयुष बडोनीने त्याचा झेल घेतला. त्याने ३० चेंडूत १० चौकारांसह ५४ धावांची खेळी केली.तो बाद झाल्यानंतर कर्णधार जितेश शर्माने फटकेबाजीला सुरुवात केली.जितेश आणि मयंक यांच्यात नाबाद १०७ धावांची भागीदारी झाली. जितेश ३३ चेंडूत ८ चौकार आणि ६ षटकारांसह ८५ धावांवर नाबाद राहिला. मयंक अगरवालने २३ चेंडूत ५ चौकारांसह नाबाद ४१ धावा केल्या.
लखनौकडून विल्यम ओरुर्कीने २ विकेट्स घेतल्या, पण त्याने तब्बल ७४ धावा खर्च केल्या. अन्य दोन विकेट्स आकाश महाराज सिंग आणि आवेश खान यांनी घेतल्या.तत्पुर्वी, बंगळुरूचा कर्णधार जितेशने नाणेफेक जिंकून प्रथम गोलंदाजी करण्याचा निर्णय घेतला होता. त्यामुळे प्रथम फलंदाजी करताना लखनौने २० षटकात ३ बाद २२७ धावा उभारल्या होत्या. लखनौकडून रिषभ पंतने ६१ चेंडूत ११८ धावांची शतकी खेळी केली. तसेच मिचेल मार्शने ३७ चेंडूत ६७ धावा केल्या. मॅथ्यू ब्रिट्झकेने १४ आणि निकोलस पूरनने १३ धावा केल्या.बंगळुरूकडून गोलंदाजी करताना नुवान तुषारा, भुवनेश्वर कुमार आणि रोमारियो शेफर्डने प्रत्येकी १ विकेट घेतली.
