परभणी, 30 जुलै – परभणी जिल्ह्यात काँग्रेस पक्ष संघटनात्मक बांधणीच्या माध्यमातून भक्कमपणे उभा करावा, असे आवाहन काँग्रेसचे प्रदेशाध्यक्ष हर्षवर्धन सपकाळ यांनी केले आहे. कार्यकर्ते आणि स्थानिक नेते यांनी एकत्र येऊन पक्षाची घडी नव्याने बसवावी, असेही त्यांनी स्पष्ट केले.
वरपुडकरांच्या भाजप प्रवेशाच्या पार्श्वभूमीवर बैठक
ज्येष्ठ काँग्रेस नेते व जिल्हा काँग्रेस कमिटीचे अध्यक्ष सुरेश वरपुडकर यांनी भाजपमध्ये प्रवेश केल्याच्या पार्श्वभूमीवर, सपकाळ यांनी परभणीतील काँग्रेस पदाधिकाऱ्यांना जालना येथे खासदार कल्याणराव काळे यांच्या कार्यालयात बैठकीसाठी बोलावले होते.
या बैठकीत सपकाळ यांनी स्थानिक नेत्यांशी संवाद साधत पक्ष संघटन बळकट करण्याच्या उपायांवर चर्चा केली. त्यांनी स्पष्ट केले की, रिक्त झालेल्या जिल्हाध्यक्ष पदावर लवकरच निष्ठावान आणि अनुभवी नेत्याची नियुक्ती केली जाईल. त्याआधी पक्ष निरीक्षक जिल्ह्यात पाठवून कार्यकर्त्यांचे मत घेतले जाईल, अशी ग्वाही त्यांनी दिली.
बैठकीला उपस्थित नेते आणि पदाधिकारी
या बैठकीला अनेक माजी आमदार, खासदार, पदाधिकारी आणि युवा नेते उपस्थित होते. यामध्ये:
-
माजी आमदार सुरेशदादा देशमुख
-
माजी खासदार अ‍ॅड. तुकाराम रेंगे पाटील
-
माजी उपमहापौर भगवानराव वाघमारे
-
माजी जिल्हा परिषद सभापती रामभाऊ घाडगे
-
महानगर जिल्हाध्यक्ष नदीम इनामदार
-
प्रदेश उपाध्यक्ष बाळासाहेब देशमुख
-
अनुसूचित जाती-जमाती विभागाचे प्रदेशाध्यक्ष सिद्धार्थ हत्तीअंबीरे
-
प्रदेश सरचिटणीस मुजाहीद खान
-
युवा नेते रविराज देशमुख, तसेच इतर अनेक स्थानिक पदाधिकारी
बैठकीत, काँग्रेसच्या कार्यकर्त्यांनी रिक्त झालेल्या पदावर स्थानिक व निष्ठावान नेत्याचीच नियुक्ती व्हावी, अशी अपेक्षा व्यक्त केली.
वरपुडकरांच्या जाण्याबाबत संयत प्रतिक्रिया
वरपुडकरांच्या भाजप प्रवेशावर प्रतिक्रिया देताना सपकाळ म्हणाले, “ते पक्षातील ज्येष्ठ व अनुभवी नेते होते. काही अडचणीमुळे त्यांनी हा निर्णय घेतला असावा.” मात्र, यामुळे स्थानिक काँग्रेस कार्यकर्त्यांमध्ये नवचैतन्य निर्माण करून पक्ष पुन्हा उभा करण्याचे आवाहनही त्यांनी केले.
