पुणे : पुणे येथील ज्येष्ठ भौतिकशास्त्रज्ञ प्रा. रोहिणी गोडबोले यांना फ्रान्सचा ‘नॅशनल ऑर्डर ऑफ मेरिट’ हा सर्वोच्च स्तरावरील सन्मान जाहीर झाला आहे. भारत आणि फ्रान्स यांच्यातील संयुक्त संशोधन प्रकल्पांसोबत मूलभूत विज्ञान संशोधनात महिलांचे प्रमाण वाढावे, यासाठी दिलेल्या योगदानासाठी प्रा. गोडबोले यांची या अत्यंत मानाच्या पुरस्कारासाठी निवड झाली आहे.
फ्रान्सचे ‘ऑर्डर ऑफ मेरिट’ हे पुरस्कार भारतातील पद्म पुरस्कारांच्या दर्जाचे मानले जातात. मूळच्या पुण्याच्या असलेल्या प्रा. गोडबोले या बेंगळुरू येथील ‘इंडियन इन्स्टिट्यूट ऑफ सायन्स’मधील (आयआयएस्सी) ‘सेंटर फॉर हाय एनर्जी फिजिक्स’मध्ये कार्यरत आहेत. ‘इंडो फ्रेंच सेंटर फॉर द प्रमोशन ऑफ अॅडव्हान्स रिसर्च’ या परिषदेच्या अंतर्गत गेली अनेक वर्षे त्यांनी भारत आणि फ्रान्समधील संयुक्त संशोधन प्रकल्पांच्या विकासासाठी काम केले आहे.
तुमच्या हक्काचे ‘सुराज्य डिजिटल’ फेसबुक पेज, ट्विटर, कू ॲपवर आणि ‘टेलिग्राम’वरही उपलब्ध
‘प्रा. गोडबोले यांची त्यांच्या पार्टिकल फिजिक्स विषयातील उल्लेखनीय संशोधनासाठी भारतासह आंतरराष्ट्रीय पातळीवर विशेष ओळख आहे. फ्रान्सची राष्ट्रीय संशोधन संस्था असणाऱ्या ‘सीएनआरएस’च्या ‘इंडो-फ्रेंच लॅबोरेटरी इन थिअरॉटिकल हाय एनर्जी फिजिक्स’सोबत त्यांनी मूलभूत संशोधनाचे प्रकल्प राबवले आहेत. ‘सीएनआरएस आणि आयआयएस्सी’च्या संयुक्त संशोधन प्रकल्पांना मोठे यश मिळाले.
भारतात सर्वसामान्यांमध्ये मूलभूत विज्ञानाचा प्रसार व्हावा, यासाठी; तसेच विज्ञानामध्ये महिलांचे प्रमाण वाढावे, यासाठीही प्रा. गोडबोले प्रयत्नशील असतात. विज्ञानातील या योगदानासाठी त्यांची ‘नॅशनल ऑर्डर ऑफ मेरिट’ सन्मानासाठी निवड करण्यात येत आहे,’ अशा शब्दांत फ्रेंच दूतावासाकडून प्रा. गोडबोले यांचा सन्मान करण्यात आला आहे. २०१९ मध्ये प्रा. गोडबोले यांना भारत सरकारतर्फे ‘पद्मश्री’ने सन्मानित करण्यात आले होते. प्रा. गोडबोले या मूळच्या पुण्याच्या असून, हुजूरपागा हायस्कूल, स. प. महाविद्यालय आणि तत्कालीन पुणे विद्यापीठात त्यांचे शिक्षण पूर्ण झाले. त्यानंतर मुंबईच्या आयआयटीमधून त्यांनी पीएचडी मिळवली.
