उस्मानाबाद : कोरोनापासून बचाव करण्यासाठी सॅनिटायझरने हात धुवा, असे वारंवार सांगितले जात आहे. परंतु सॅनिटायझरचा कोण, कशासाठी वापर करेल सांगता येत नाही. उस्मानाबादमध्ये सॅनिटायझर स्प्रे मारून धोकादायक जुगाड पाहवयास मिळाला आहे. जाणून घेऊया विस्तृतपणे.
कोरोना विषाणूचा प्रसार रोखण्यासाठी ग्रामपंचायतीच्या माध्यमातून सॅनिटायझर वाटप करण्यात आले. मात्र, उस्मानाबादमध्ये रॉकेल मिळत नसल्याने गृहिणींनी शक्कल लढवत चूल पेटवायला सॅनिटायझरचा वापर केल्याचा धोकादायक प्रकार पुढे आला आहे. उस्मानाबाद जिल्ह्यातील काही गावांमध्ये आगळीवेगळी शक्कल लढवली जात आहे. रॉकेल मिळत नाही म्हणून चूल पेटवण्यासाठी चक्क सॅनिटायझरचा वापर होत आहे. सॅनिटायझर स्प्रे मारून चूल पेटविण्यात येत आहे.
तुमच्या हक्काचे ‘सुराज्य डिजिटल’ फेसबुक पेज, ट्विटर, शेअरचॅट आणि ‘टेलिग्राम’वरही उपलब्ध
कोरोना संकटकाळात ग्रामपंचायतीने गावात सॅनिटायझर पुरवले ते हात निर्जंतुक करण्यासाठी. पण गावकरी सध्या या सॅनिटायझरचा वापर चक्क चुली पेटवण्यासाठी करत आहेत. पावसाळ्यात चूल पेटवणे हे नक्कीच खायचं काम नाही. त्यात रेशनवर रॉकेलही मिळत नाही. त्यामुळे आयाबायांनी सॅनिटायझरचा वापर करून जाळ काढायला सुरूवात केली आहे, अशी माहिती गावकरी चंद्रभागा लिमये यांनी दिली.
” हा प्रकार फारच धोकादायक आहे. सॅनिटायझरचा असा वापर वेळप्रसंगी जीवावरही बेतू शकतो, त्यामुळे केवळ सॅनिटायझरचा पुरवठा करून ग्रामपंचायतींना आपली जबाबदारी झटकता येणार नाही. तर सॅनिटायझर वापराबाबत जनजागृती देखील करावी लागेल”
डॉ. एच. व्ही. वडगावे – जिल्हा आरोग्य अधिकारी, उस्मानाबाद
