मुंबई, 8 ऑगस्ट – सिद्धिविनायक मंदिरात येत्या १२ ऑगस्ट रोजीच्या अंगारकी निमित्त श्री गणेश दर्शनासाठी विशेष व्यवस्था करण्यात आली आहे. पहाटे ३:१५ वाजता महापूजेनंतर दिवसभर पूजासत्रे, दर्शन, भजने आणि आरत्या होणार असून रात्री ११:५० वाजेपर्यंत दर्शन सुरू राहील. मात्र, या दिवशी मंदिरात कॅमेरा आणि लॅपटॉप घेऊन जाण्यास मनाई करण्यात आली आहे.
गाभारा परिसरात वैद्यकीय पथक तसेच दोन रुग्णवाहिका, यापैकी एक कार्डियक रुग्णवाहिका, तैनात केली जाणार आहे. सुरक्षेसाठी फायर इंजिन, अग्निशामक वाहन, फायर एक्स्टिंगविशर, फायर बकेट आणि फायर मार्शलची व्यवस्था केली आहे. वीज पुरवठा खंडित होऊ नये म्हणून बेस्टचे अधिकारी व कर्मचारी सज्ज राहतील. कुलाबा-वांद्रे-सीप्झ मेट्रो ३ सेवेमधील सिद्धिविनायक स्थानक खुलं झाल्याने भाविकांना मेट्रोनेही येता येईल, तसेच मोफत बससेवाही उपलब्ध आहे.
