पुणे, 13 सप्टेंबर। सीओईपी तंत्रज्ञान विद्यापीठातील १५० वर्षांचा वारसा असलेले ग्रंथालय आता नव्या इमारतीत स्थलांतरित होणार आहे. माजी विद्यार्थिनीच्या कुटुंबियांनी दिलेली देणगी आणि राज्य सरकारने दिलेल्या निधीतून सात मजली नव्या इमारतीमध्ये ग्रंथालयासह संगणक अभियांत्रिकी विभागाचा समावेश असून, या इमारतीचे उद्घाटन मुख्यमंत्री देवेंद्र फडणवीस यांच्या हस्ते रविवारी (१४ सप्टेंबर) होणार आहे.
तसेच अभियंता दिनानिमित्त सात माजी विद्यार्थ्यांना गौरवण्यात येणार आहे. विद्यापीठाचे कुलगुरू डॉ. सुनील भिरूड, नियामक मंडळाचे सदस्य, माजी विद्यार्थी संघटनेचे अध्यक्ष भरत गिते यांनी या बाबत पत्रकार परिषदेत माहिती दिली. कुलसचिव डॉ. डी. एन. सोनावणे उपस्थित होते. दुपारी दोन वाजता होणाऱ्या कार्यक्रमावेळी उपमुख्यमंत्री अजित पवार, उच्च व तंत्रशिक्षणमंत्री चंद्रकांत पाटील उपस्थित राहणार आहेत.
डॉ. भिरूड म्हणाले, सीओईपीच्या माजी विद्यार्थिनी गौरी शहा यांच्या कुटुंबियांनी त्यांच्या स्मृतीप्रित्यर्थ सीओईपीला सहा कोटी रुपयांची देणगी दिली. तसेच राज्य सरकारने ५१ कोटी रुपये दिले. या निधीतून नव्या इमारतीची उभारणी करण्यात आली आहे. या इमारतीतील तीन मजले ग्रंथालयासाठी, तर चार मजले संगणक अभियांत्रिकी विभागासाठी वापरण्यात येणार आहेत. ग्रंथालयात डिजिटल ग्रंथालयासह वाचनकक्षासारख्या सुविधा उपलब्ध करून देण्यात आल्या आहेत. ग्रंथालयात चार हजारांहून अधिक पुस्तके आहेत. तसेच अनेक दुर्मीळ ग्रंथ आहेत. विद्यार्थ्यांना अधिकाधिक वेळ अभ्यास, वाचन करता येण्यासाठी २४ तास वाचन कक्ष सुरू ठेवण्याचा मानस आहे असे यांनी सांगितले.
