सोलापूर : सराईत गुन्हेगारांना पकडण्यासाठी गेलेल्या पोलिस पथकावर चिंचोली काटी येथे जीवघेणा हल्ला झाला. या हल्ल्यात पोलिस नाईक सुभाष शेंडगे यांच्या डाव्या पायाच्या घोट्यास व हातास गंभीर जखम झाली. या प्रकरणी जिल्हा व सत्र न्यायाधीश व्ही. पी. आव्हाड यांनी आरोपींना पाच वर्षांच्या सक्‍तमजुरीची शिक्षा ठोठावली.
सराईत गुन्हेगार बापू चव्हाण, लखन श्‍यामराव काळे व किसन श्‍यामराव काळे असे शिक्षा ठोठावलेल्या आरोपींची नावे आहेत. सोलापूर ग्रामीण पोलिसांच्या रेकॉर्डवरील गुन्हेगार लखन काळे व किसन काळे हे चिंचोली काटी (ता. मोहोळ) येथील त्यांचे नातेवाईक बापू चव्हाण यांच्या घरात लपून बसल्याची माहिती पोलिसांना मिळाली. त्यानंतर 1 नोव्हेंबर 2014 रोजी पोलिस उपनिरीक्षक संदीप चव्हाण यांच्या नेतृत्वाखाली दहा पोलिसांचे पथक त्या ठिकाणी पोचले.
तुमच्या हक्काचे ‘सुराज्य डिजिटल’ फेसबुक पेज, ट्विटर, कू ॲपवर आणि ‘टेलिग्राम’वरही उपलब्ध
चव्हाण याला पोलिस कारवाईची चाहूल लागली. त्यानंतर त्याने लखन व किसन काळे यांना सावध केले. चव्हाण हा कुऱ्हाड घेऊन बाहेर आला तर दोन्ही काळे तलवारी घेऊन घराबाहेर आले. पोलिस आणि त्यांच्यात झालेल्या झटापटीत एकाने पोलिस नाईक सुभाष शेंडगे यांच्या डोक्‍यात वार करण्याचा प्रयत्न केला. त्यांनी तो हुकवण्यासाठी उजवा हात समोर केला आणि त्यात त्यांच्या हाताचे हाड मोडले. त्यानंतर किसन काळे याने शेंडगे यांच्या पायावर वार करून त्यांचा घोटा तोडला.
या प्रकरणानंतर मोहोळ पोलिसांनी तत्काळ तपास करीत न्यायालयात दोषारोपपत्र दाखल केले. हल्ल्यानंतर तिघेही हत्यारे घेऊन पसार झाल्याने हत्यारे जप्त केलेली नव्हती. न्यायालयाने सरकारी वकिलांचा युक्‍तिवाद ग्राह्य धरून तिघांनाही पाच वर्षांच्या सक्‍तमजुरीची शिक्षा ठोठावली. या प्रकरणात सरकारतर्फे ॲड. शांतवीर महिंद्रकर यांनी तर आरोपींतर्फे ॲड. गडदे यांनी काम पाहिले.
