सोलापूर, 23 जून (हिं.स.)।
कार जाण्यासाठी वाट न सोडणाऱ्या तरुणांसमोर हॉर्न वाजविणाऱ्या चालकास बाजूने जायला सांगितले. त्यावेळी एकमेकांना शिवीगाळ झाली आणि काही वेळाने दोन गटात दगडफेक सुरू झाली. त्यात अल्पवयीन मुले देखील सहभागी असल्याचेेही समोर आले. ही घटना भवानी पेठेतील घोंगडे वस्ती परिसरात घडली आहे. दगडफेकीत दुचाकीसह अन्य वाहनांचे नुकसान झाले आहे. तिघेजण जखमी झाले आहेत.
गटागटाने थांबून महिलांकडे पाहणे, रस्त्यावर थांबून रस्ता अडविणे, मुलींकडे वाईट हेतूने पाहणे, वाहने भरधाव चालविणे, दुसऱ्या परिसरातील तरुणांना त्या भागात बोलावण्याचे प्रकार सतत सुरू होते. त्यामुळे दोन गटात काही दिवसांपासून तणावाचे वातावरण होते, त्याचा उद्रेक झाल्याची चर्चा घटनास्थळी सुरू होती.
दगडफेकीची माहिती मिळताच जोडभावी पेठ पोलिस त्याठिकाणी दाखल झाले. सहायक पोलिस आयुक्त प्रताप पोमण, वरिष्ठ पोलिस निरीक्षक सुरज मुलाणी हेही तेथे उपस्थित होते. त्यावेळी दंगा नियंत्रण पथक, शीघ्र प्रतिसाद दलाचे अंमलदारही बोलावण्यात आले होते. पोलिसांनी परिसरात गस्त सुरू केली होती.
