चेन्नई, 3 ऑगस्ट – प्रसिद्ध तमिळ अभिनेते आणि विनोदी कलाकार माधन बॉब यांचे ७१ व्या वर्षी निधन झाले आहे. ते गेल्या अनेक वर्षांपासून कॅन्सरशी झुंज देत होते. आज, ३ ऑगस्ट रोजी चेन्नईतील रुग्णालयात त्यांनी अखेरचा श्वास घेतला. त्यांच्या निधनाने चाहत्यांमध्ये आणि चित्रपटसृष्टीत हळहळ व्यक्त होत आहे.
माधन बॉब यांचे खरे नाव एस. कृष्णमूर्ती होते. त्यांनी ‘अरुणाचलम’, ‘गिरी’, ‘सिंघम’ आणि ‘शिवा’ यांसारख्या अनेक लोकप्रिय तमिळ चित्रपटांमध्ये काम केले. त्यांच्या खास विनोदी शैलीमुळे ते प्रेक्षकांमध्ये प्रचंड लोकप्रिय झाले.
चित्रपटात प्रवेश करण्यापूर्वी माधन बॉब हे संगीतकार होते आणि अनेक संगीत कार्यक्रमांमध्ये त्यांनी भाग घेतला होता. नंतर अभिनय क्षेत्रात प्रवेश करून त्यांनी विनोदी भूमिकांमधून प्रेक्षकांचे मन जिंकले. ते काही टीव्ही शोमध्ये परीक्षक म्हणूनही दिसले.
माधन बॉब यांनी ‘चाची ४२०’ या बॉलिवूड चित्रपटातही काम केले आहे. रजनीकांत, कमल हासन यांसारख्या दिग्गज कलाकारांसोबत त्यांनी स्क्रीन शेअर केली.
