हैद्राबाद, 30 जून (हिं.स.)।तेलंगणाच्या संगारेड्डी जिल्ह्यातील एका केमिकल कारखान्यात भीषण स्फोट झाला आहे. या घटनेत किमान १० जणांचा मृत्यू झाला, तर २० हून अधिक जण जखमी झाले आहेत.जखमींना रुग्णालयात दाखल करण्यात आले असून, घटनास्थळी मदत आणि बचाव कार्य सुरू आहे.
यासंदर्भात मिळालेल्या माहितीनुसार पाटण चेरू मंडळातील सिगाची केमिकल्स इंडस्ट्रीमध्ये हा स्फोट झाला.हा स्फोट सकाळी ७ वाजता झाला. कामगार कारखान्यात काम करत असताना अचानक स्फोट झाला. मोठा स्फोट ऐकून कर्मचारी घाबरुन बाहेर पळाले. स्फोटानंतर अनेक कामगार त्यात अडकले, त्यापैकी किमान १० जणांचा मृत्यू झाल्याची माहिती मिळत आहे.ढिगाऱ्याखालून 5 कामगारांचे मृतदेह सापडले आहेत.तर १३ जणांना वाचवण्यात आले आहे. तसेच अनेकजण गंभीर जखमी आहेत. अधिकाऱ्यांचे म्हणणे आहे की, मृतांचा आकडा वाढू शकतो. त्याचबरोबर ढिगाऱ्याखाली अनेक लोक अडकल्याची माहिती मिळत आहे. आग आटोक्यात आणण्यासाठी अग्निशमन दलाच्या ११ गाड्या घटनास्थळी दाखल झाल्या आहेत.या स्फोटाचे नेमके कारण अद्याप समोर आलेले नाही. मात्र माहितीनुसार, रिअ‍ॅक्टरमध्ये अचानक रासायनिक प्रतिक्रिया वेगाने झाल्यामुळे स्फोट झाला असावा. त्यानंतर आगीने रौद्र रुप धारण केले. हा संपूर्ण परिसर आगीच्या विळख्यात आला. संगारेड्डीचे पोलीस
अधीक्षक परितोष पंकज यांनी सांगितले की, हा स्फोट इतका मोठा होता की परिसरात दहशत निर्माण झाली होती. या स्फोटानंतर संपूर्ण परिसरात धुराचे लोट दिसत होते. आगीच्या ज्वाळांनी कारखान्याला पूर्णपणे वेढले. यात 10 कामगारांचा होरपळून मृत्यू झाला आहे. घटनेची माहिती मिळताच अग्निशमन दलाच्या 11 गाड्या तात्काळ घटनास्थळी दाखल झाल्या. सिगाची फार्मा कंपनी, पासामैलाराम फेज-1 येथे घडली. अग्निशमन 11गाड्या घटनास्थळी पोहोचल्या आहेत.सुमारे 20 लोक जखमी झाले असूनप्रशासनाकडून बचावकार्य सुरू आहे.
