नाशिक, 18 जून (हिं.स.)।
– राष्ट्रीय महामार्ग प्राधिकरणाच्या माध्यमातून द्वारका ते नाशिकरोड डबलडेकर उड्डाणपुलाच्या उभारणीचा मार्ग मोकळा झाला असून, या उड्डाणपुलावर मेट्रो चालविण्यासंदर्भात ना हरकत दाखला देण्याची तयारी महामेट्रोचे व्यवस्थापकीय संचालक श्रवण हर्डीकर यांनी दर्शविल्याची माहिती नाशिकचे खासदार राजाभाऊ वाजे यांनी दिली आहे. यासंदर्भात सोमवारी 23 रोजी नाशिकमध्ये महामेट्रोच्या अधिकाऱ्यांसमवेत बैठक होत आहे. नाशिकसाठी प्रस्तावित असलेली मेट्रो ‘आर्टिक्युलेटेड बस मेट्रो असेलअशी माहिती यावेळी त्यांनी दिली.
द्वारका ते नाशिकरोडउड्डाणपुलाचे रखडलेले काम महामेट्रो आणि राष्ट्रीय महामार्ग प्राधिकरण यांच्यामधील समन्वयातून मार्गी लावण्यासाठी खा. वाजे यांनी महामेट्रोचे व्यवस्थापकीय संचालक हर्डीकर यांची भेट घेतली. केंद्रीय मंत्री नितीन गडकरी यांच्यासूचनेनुसारडबलडेकर उड्डाणपुलाची उभारणी करताना महामेट्रोची ना हरकत मिळविण्याबाबत बैठकीत चर्चा झाली, हर्डीकर यांनी याबाबत सकारात्मकता दर्शवली असून, राष्ट्रीय महामार्ग प्राधिकरण जर उड्डाणपूल करत असेल, तर महा मेट्रोसाठी जागा राखीव ठेवण्याचीविनंती महामेट्रोच्या वतीने केली जाईल, असे यावेळी हर्डीकर यांनी सांगितले. नाशिकसाठी प्रस्तावित असलेली मेट्रो ही वेगळ्या प्रकारची आधुनिक प्रणाली असणार आहे, जी थेट रस्त्यावर चालणारी ‘आर्टिक्युलेटेड बस मेट्रो’ असेल, अशीही माहिती यावेळी त्यांनी दिली.
डबलडेकर उड्डाणपूल, मेट्रोसाठी वस्तुनिष्ठ पाठपुरावा करून हे प्रकल्प कसे लवकर मंजूर होतील, त्यांना निधी उपलब्ध होईल आणि खऱ्या अर्थाने कामाला सुरुवात होईल, यासाठी युद्ध पातळीवर पाठपुरावा केला जात आहे. केंद्रीय मंत्री गडकरी यांनीदेखील मागील तीन बैठकांमध्ये नाशिकरोड ते द्वारका उड्डाणपुलाबाबत सकारात्मकता दर्शवली आहे.
राजाभाऊ वाजे, खासदार
