पुणे, 6 जून, (हिं.स.)। पुणे शहरातील सांडपाण्यात कोरोना विषाणूचा अंश आढळून आल्याने पुणेकरांमध्ये चिंतेचे वातावरण पसरले आहे. राष्ट्रीय रासायनिक प्रयोगशाळेने (एनसीएल) केलेल्या तपासणीतून ही धक्कादायक माहिती समोर आली आहे. मे 2025 पासून शहरातील सांडपाणी प्रक्रिया प्रकल्पांमधील नमुन्यांमध्ये कोरोना विषाणूच्या अंशाचे प्रमाण वाढत असल्याचे निष्कर्ष सादर झाले आहेत. यामुळे प्रशासन आणि नागरिकांमध्ये सतर्कतेची गरज निर्माण झाली आहे.
शहरातील 10 सांडपाणी प्रक्रिया प्रकल्पांमधील पाण्याचे नमुने दर आठवड्याला तपासले जातात. या तपासणीत 40 ते 60 नमुन्यांचा समावेश असतो. राष्ट्रीय रासायनिक प्रयोगशाळेच्या अहवालानुसार, गेल्या काही आठवड्यांपासून या सर्व नमुन्यांमध्ये कोरोना विषाणूचा अंश आढळून आला आहे.
राज्यात गेल्या 24 तासांत 98 नव्या कोरोना रुग्णांची नोंद झाली असून, यापैकी सर्वाधिक 34 रुग्ण पुणे शहरात आढळले आहेत. पिंपरी-चिंचवड परिसरात 10, तर पुणे ग्रामीण भागात 4 नवे रुग्ण आढळले आहेत. ही आकडेवारी गेल्या काही आठवड्यांपासून वाढत असल्याचे प्रशासनाने नमूद केले आहे.
—————
