सोलापूर : तुळजापूर रोडवरील ऊळेगाव येथे दुचाकीवरून घसरल्याने धोंडीबा तुकाराम वाघमारे (वय २८ रा. विजापूर नाका झोपडपट्टी सोलापूर) हा तरुण गंभीर जखमी होऊन उपचारापूर्वीच मयत झाला. हा अपघात काल रविवारी रात्रीच्या सुमारास घडला.
मयत धोंडीबा वाघमारे हा त्याचा भाऊ चंद्रकांत वाघमारे याच्या दुचाकीवरून तामलवाडी ते सोलापूर असा प्रवास करीत होता. उळेगाव येथील दर्शन हॉटेल जवळ दुचाकी घसरल्याने दोघेजण जखमी झाले होते. त्यांना शासकीय रुग्णालयात दाखल केले असता धोंडीबा वाघमारे हा मरण पावला. या अपघाताची नोंद तालुका पोलिसात झाली आहे.
* अल्पवयीन तरुणीची गळफास घेऊन आत्महत्या
सोलापूर – एमआयडीसी परिसरातील अरफात नगर येथे राहणाऱ्या एका १७ वर्षीय अल्पवयीन तरुणीने गळफास घेऊन आत्महत्या केली. ही घटना आज सोमवारी सकाळच्या सुमारास घडली.
तुमच्या हक्काचे ‘सुराज्य डिजिटल’ फेसबुक पेज, ट्विटर, कू ॲपवर आणि ‘टेलिग्राम’वरही उपलब्ध
सपना सुभाष चव्हाण (वय १७ रा. अरफात नगर) असे मयताचे नाव आहे आज सकाळी तिचे आई-वडील तुळजापूर येथे गेले होते. ती घरात एकटीच असताना छताच्या पंख्याला साडीने गळफास घेतली होती. या घटनेची नोंद एमआयडीसी पोलिसात झाली असून यामागचे कारण समजले नाही. हवालदार पवार पुढील तपास करीत आहेत.
* सव्वा दोन लाखांची चोरी स्वतःच्या मुलावर गुन्हा दाखल
सोलापूर – बार्डी (तालुका पंढरपूर )येथे एका शेतकऱ्याच्या घरात रोख रकमेसह सव्वा दोन लाखाचे दागिने चोरीस गेले. ही घटना २४ नोव्हेंबर रोजी दिवसा घडली. या प्रकरणात करकंबच्या पोलिसांनी त्यांच्या मुलावर गुन्हा दाखल केला आहे.
बार्डी येथे आप्पासाहेब गुंडीबा रोकडे (व य६०) हे शेतकरी राहण्यास आहेत.२४ नोव्हेंबर रोजी दुपारच्या सुमारास त्यांच्या घरातील कपाटाच्या ड्राव्हर मधून १ लाख ११रुपये रोख आणि ५४ ग्रॅम सोन्याचे दागिने असा २ लाख १७ हजाराचा ऐवज चोरीस गेला होता. ही चोरी आपला मुलगा आनंद आप्पासाहेब रोकडे याने केल्याची फिर्याद त्यांनी नुकतीच पोलिसात दाखल केली. पुढील तपास हवालदार वाघमारे करीत आहेत .
* पुरंदावडे येथे दुकानाची भिंत फोडून चोरी
पुरंदावडे (ता.माळशिरस) येथे राहणाऱ्या परमेष्ठी दिलीपकुमार जोशी यांच्या बंद किराणा दुकानाच्या डाव्या बाजूची भिंत फोडून चोरट्याने १०हजार रुपये रोख आणि किराणा साहित्य असा ४१ हजाराचा माल पळविला. ही चोरी सोमवारी पहाटे झाल्याची फिर्याद जोशी यांनी माळशिरस पोलिसात दाखल केली. हवालदार भोसले पुढील तपास करीत आहेत.
