मॉस्को, 23 मे (हिं.स.)। पाकिस्तानचा दहशतवादी चेहरा जगासमोर आणण्यासाठी भारतीय खासदारांचे शिष्टमंडळ विविध देशांचा दौरा करत आहेत. दरम्यान, आज, शुक्रवारी एक शिष्टमंडळ रशियाला पोहोचले असता मोठी घटना घडली.विमान राजधानी मॉस्कोतील विमानतळावर उतरणार, तेवढ्यात या विमानतळावर युक्रेनने ड्रोन हल्ला केला. यामुळे विमानाला बराच वेळ लँडिंग करता आले नाही.
मिळालेल्या माहितीनुसार, शिष्टमंडळात द्रमुक खासदार कनिमोझी, समाजवादी पक्षाचे खासदार राजीव राय, राजद खासदार प्रेमचंद गुप्ता, कॅप्टन ब्रिजेश, अशोक कुमार मित्तल आणि राजदूत मंजीव सिंह पुरी यांचा समावेश आहे. या शिष्टमंडळाचे विमान आज (दि.२३) मॉस्कोमध्ये दाखल होताच युक्रेनने विमानतळावर ड्रोन हल्ला केला. युक्रेनने केलेल्या ड्रोन हल्ल्यामुळे मॉस्कोमधील सर्व विमानतळांवर विमानांची वाहतूक बंद करण्यात आली. यामुळे विमानाला बराचवेळ लँडिंग करता आले नाही.
रशियाने विमानतळांवर विमानांची वाहतूक बंद केल्याने भारतीय शिष्टमंडळाच्या विमानाला बराच वेळ हवेत गिरक्या माराव्या लागल्या. काही वेळानंतर हिरवा सिग्नल मिळताच विमान मॉस्कोमध्ये उतरवण्यात आले. विमान उतरल्यानंतर सर्व खासदारांचे मॉस्कोमधील भारतीय राजदूत विनय कुमार यांनी स्वागत केले. सर्व खासदार रशियन सरकार, वरिष्ठ खासदार, अधिकारी आणि तज्ञांना पाकिस्तानमध्ये वाढणाऱ्या दहशतवादाची माहिती देणार आहेत.
रशियाचे राष्ट्राध्यक्ष व्लादिमीर पुतिन यांनी अलीकडेच डोनाल्ड ट्रम्प यांच्याशी झालेल्या संभाषणात म्हटले होते की, जेव्हा जेव्हा एखाद्या देशातील सरकारी शिष्टमंडळ रशियाला भेट देते, तेव्हा युक्रेन मॉस्कोवर ड्रोन हल्ला करतो. पुतिन यांच्या मते, युक्रेन हे जाणूनबुजून करतोय. दरम्यान, या हल्ल्याबाबत अद्याप युक्रेनने कोणतीही प्रतिक्रिया दिलेली नाही.
