मुंबई, १७ मार्च (हिं.स.) : विधान परिषदेतील पाच जागांसाठी पोटनिवडणूक घोषित झाली आहे. त्यासाठी शिवसेनेकडून (शिंदे गट) चंद्रकांत रघुवंशी, राष्ट्रवादी काँग्रेसकडून (अजित पवार गट) संजय खोडके यांना उमेदवारी देण्यात आली आहे.
संजय खोडके हे आमदार सुलभा खोडके यांचे पती आहेत. त्यामुळे पती संजय खोडके वरिष्ठांच्या सभागृहात, तर पत्नी सुलभा खोडके या कनिष्ठ सभागृहात दिसतील.
२७ मार्च रोजी ही निवडणूक होणार आहे. त्यासाठी अर्ज भरण्याची आज, सोमवारी शेवटची तारीख होती. त्याच्या काही तासांपूर्वी उमेदवारांच्या नावांची घोषणा केली आहे.
शिंदे गटाचे उमेदवार रघुवंशी यांनी यापूर्वी जिल्हा परिषद आणि पंचायत समितीत काम केलं आहे. त्याआधी ते काँग्रेसमध्ये होते. मात्र, २०१९ मध्ये त्यांनी काँग्रेसची साथ सोडत शिवसेनेत प्रवेश केला. ज्यावेळी एकनाथ शिंदे यांनी उद्धव ठाकरे यांची साथ सोडली, तेव्हा रघुवंशी यांनी एकनाथ शिंदेंबरोबर जाण्याचा निर्णय घेतला.
धुळे – नंदुरबारचे शिंदे गटाचे संपर्क प्रमुख आणि माजी विधान परिषद सदस्य चंद्रकांत रघुवंशी यांचं नाव सुरुवातीपासून आघाडीवर होतं. त्याशिवाय माजी नगरसेविका शीतल म्हात्रे, शिंदे यांचे अत्यंत विश्वासू सहकारी, शिवसेना सचिव, माजी महापौर संजय मोरे, विदर्भातील शिंदे यांचे मजबूत शिलेदार नागपूरच्या किरण पांडव यांच्या नावांची सुद्धा चर्चा सुरू होती. मात्र या साऱ्यामध्ये रघुवंशी यांच्या नावावर अखेर शिक्कामोर्तब झाले.
