मुंबई, २८ ऑगस्ट. मराठी सिनेसृष्टीतील ज्येष्ठ अभिनेते बाळ कर्वे यांचे आज, गुरुवारी सकाळी वृद्धापकाळाने निधन झाले. ते ९५ वर्षांचे होते. मुंबईतील आपल्या राहत्या घरी त्यांनी अखेरचा श्वास घेतला. तीन दिवसांपूर्वीच बाळ कर्वे यांनी त्यांचा ९५ वा वाढदिवस साजरा केला होता. बाळ कर्वे यांच्या निधनामुळे आता मराठी सिनेसृष्टीवर शोककळा पसरली आहे.
बाळ कर्वे यांच्या कन्या स्वाती कर्वे यांनी एका पोस्टद्वारे बाळ कर्वे यांच्या निधनाची माहिती दिली. ज्येष्ठ अभिनेते बाळ कर्वे यांनी गुरूवारी सकाळी १०.१५ वा. अखेरचा श्वास घेतला, असे त्या म्हणाल्या. बाळ कर्वे यांनी १९७९ साली दूरदर्शनवरून प्रसारित झालेल्या चिमणराव या मालिकेत गुंड्याभाऊंची भूमिका साकारली होती. या भूमिकेने त्यांना खरी ओळख मिळवून दिली. त्यांना चित्रपटसृष्टीतही गुंड्याभाऊ याच नावाने ओळखले जात होते. या मालिकेत दिलीप प्रभावळकर आणि बाळ कर्वे यांची जोडी प्रेक्षकांना आवडली.
बाळ कर्वे यांनी टीव्ही मालिका आणि रंगभूमीवरील दर्जेदार कलाकृतींमघ्ये काम केलं. ‘सूर्याची पिल्ले’, ‘रथचक्र’, ‘तांदुळ निवडता निवडता’, ‘मनोमनी’, ‘कुसुम मनोहर लेले’ अशा नाटकांमध्ये बाळ कर्वे यांनी साकारलेल्या भूमिका गाजल्या. ‘प्रपंच’, ‘राधा ही बावरी’, ‘वहिनीसाहेब’, ‘उंच माझा झोका’ या मालिकांमध्ये बाळ कर्वेंनी काम केलं होतं. ‘जैत रे जैत’ हा बाळ कर्वेंनी अभिनय केलेला पहिला चित्रपट. या सिनेमासोबतच ‘सुंदरा सातारकर’, ‘चांदोबा चांदोबा भागलास का’, ‘चटक चांदणी’, ‘बन्याबापू’ अशा सिनेमांमध्ये त्यांनी केलेल्या भूमिका विशेष गाजल्या.
सई परांजपे यांच्या ‘कथा’ या एकमेव सिनेमात त्यांनी अभिनय केले होते. हिंदीत त्यांनी आणखी काही काम केलं नाही. मराठी मनोरंजन विश्वातील ‘प्रीतीचं झुळझुळ पाणी’ हे गाजलेलं गाणं बाळ कर्वे यांच्यावर चित्रित झालं आहे. उत्कृष्ट अभिनय, मराठी भाषेवर प्रभुत्व, नम्र स्वभाव, अभिनयाची समज आणि सहकलाकारांसोबतची मैत्री अशा गुणांमुळे बाळ कर्वे ओळखले जात असत. बाळ कर्वे यांच्या निधनानंतर मराठी मनोरंजन विश्वातील कलाकारांनी आणि चाहत्यांनी त्यांना श्रद्धांजली वाहिली आहे.
