बंगळुरू, 14 जुलै (हिं.स.) – दाक्षिणात्य चित्रपटसृष्टीतील ज्येष्ठ अभिनेत्री बी. सरोजा देवी यांचे निधन झाले आहे. त्या ८७ वर्षांच्या होत्या. त्या भारतीय चित्रपटसृष्टीतील एक प्रसिद्ध चेहरा होत्या. कन्नड व्यतिरिक्त त्यांनी तमिळ, तेलगू आणि हिंदी भाषांमधील सुमारे २०० चित्रपटांमध्ये काम केले होते. त्यांना ‘अभिनय सरस्वती’ आणि ‘कन्नडथु पेंगिली’ अशा नावांनी ओळखले जाते.
सरोजा देवींचा जन्म ७ जानेवारी १९३८ रोजी बंगळुरू येथे झाला होता. त्या पोलीस अधिकारी भैरप्पा आणि रुद्रम्मा यांची चौथी मुलगी होत्या. सरोजा देवी चित्रपटसृष्टीत साडी, दागिने आणि केशरचनांचा ट्रेंड सेट करण्यासाठी ओळखल्या जातात. त्यांनी ६० च्या दशकात ट्रेंड सेट केला. कित्तूर चेन्नम्मा, बब्रुवाहना आणि अन्नथांगी सारख्या चित्रपटांसाठी त्या विशेष स्मरणात राहतील.
सरोजा देवी यांनी वयाच्या १७ व्या वर्षी त्यांच्या अभिनय कारकिर्दीला सुरुवात केली. १९५५ च्या ‘महाकवी कालिदास’ या चित्रपटात त्या दिसल्या. परंतु, १९५८ च्या ‘नादोदी मन्नन’ या चित्रपटातून त्यांना ओळख मिळाली. यामध्ये त्या एमजी रामचंद्रन (एमजीआर) यांच्यासोबत दिसल्या. या चित्रपटातूनच त्या तमिळ चित्रपटसृष्टीतील एक प्रतिष्ठित अभिनेत्री बनल्या.
सरोजा देवी यांना चित्रपटसृष्टीतील योगदानाबद्दल अनेक सन्मान देखील मिळाले आहेत. १९६९ मध्ये त्यांना पद्मश्री आणि १९९२ मध्ये पद्मभूषण पुरस्काराने सन्मानित करण्यात आले. याशिवाय तामिळनाडूचा कलाइमामणी पुरस्कार आणि बंगळुरू विद्यापीठाकडून मानद डॉक्टरेट देखील मिळाली आहे. ५३ व्या राष्ट्रीय चित्रपट पुरस्कारांच्या ज्युरीचे अध्यक्षपदही त्यांनी भूषवले आहे.
दरम्यान, कर्नाटकचे मुख्यमंत्री सिद्धरामय्या यांनी अभिनेत्री सरोजा देवी यांच्या निधनाबद्दल शोक व्यक्त केला आहे. त्यांनी पोस्ट केलेल्या शेअरमध्ये लिहिले की, ‘त्यांचे निधन भारतीय चित्रपटसृष्टीसाठी एक मोठे नुकसान आहे. मी प्रार्थना करतो की सरोजा देवी यांच्या आत्म्याला शांती मिळो. त्यांच्या कुटुंबाप्रती माझ्या संवेदना.’
