सोलापूर/प्रतिनिधी
सोलापूर कृषी उत्पन्न बाजार समितीच्या 18 संचालकपदाच्या निवडीसाठी आज रविवार (ता.27) मतदान होत आहे. मुख्यत्वे, सोलापूर शहरासह अन्य अशा आठ ठिकाणी सीसीटीव्हीच्या निगराणीखाली पहिल्यांदाच मतदान प्रक्रिया राबत आहे. अत्यंत पारदर्शी आणि सुरळीत मतदान प्रक्रिया पार पडण्याच्यादृष्टीने प्रशासनाने तयारी केली आहे. मतदान प्रक्रियेसाठी यंत्रणा सज्ज झाली आहे.प्रत्येक मतदान केंद्रावर मोठा पोलीस बंदोबस्त तैनात असणार आहे. सीसीटीव्ही आणि पोलिसांची करडी नजर यामुळे मतदान केंद्रांवर अजिबात मतदारांवर दबाव आणणे, मतदार केंद्र ताब्यात घेण्यासाठी धटिंग करणे हे प्रकार अजिबात होणार नाहीत, याची दक्षता घेतली जाणार आहे, जिल्हा उपनिबंधक किरण गायकवाड यांनी ही माहिती दिली आहे.
साधारण दीड वर्षांपासून सोलापूर कृषी उत्पन्न बाजार समिती निवडणूक रखडली होती.पणन विभागाच्या आदेशानुसार निवडणूक प्रकियेस गेल्या एक महिन्यापासून सुरू झाली आहे. आज मतदान होणार आहे. निवडणूक साठी 71 उमेदवार रिंगणात असून सोलापूर शहरात 1,तर उत्तर व दक्षिण मधील 7 मतदान केंद्रावर सकाळी 8 वा पासून ते संध्याकाळी 5 वाजेपर्यंत मतदान होणार आहे.ही मतदान प्रकिया पार पाडण्यासाठी 140 कर्मचारी, पोलीस यंत्रणा कार्यनवीत करण्यात आली आहे. प्रत्येक मतदान केंद्रावर सीसीटीव्ही बसविण्यात आले असून यावर बारीक लक्ष उपनिबंधक किरण गायकवाड ठेवणार आहेत. 18 संचालक मंडळ साठी उत्तर व दक्षिण मधून सह सोसायटी-1895, ग्रामपंचायत-1176, व्यापारी- 1275, हमाल-तोलार-1084 असे एकूण 5421 मतदार मतदानाचा हक्क बजावणार आहेत.
मतमोजणी केंद्रावर ‘यांना’च मिळणार प्रवेश
सोमवार (ता.28) रोजी सकाळी 8 वा पासून मोठ्या पोलीस बंदोबस्ता मध्ये सिद्धेश्‍वर साखर कारखाना परिसरातील स्व. आपासाहेब काडादी मंगल कार्यालयात मतमोजणी होणार आहे यावेळी उमेदवार अथवा प्रतिनिधीस परवानगी दिली जाणार आहे.
