बॉलिवूडचा भाईजान सलमान खान (Salman Khan) आणि अभिनेत्री भाग्यश्रीचा (Bhagyashree) ब्लॉकबस्टर चित्रपट ‘मैंने प्यार किया’ने अनेक विक्रम आपल्या नावावर केले. हा चित्रपट 80 च्या दशकात बॉक्स ऑफिसवर सर्वाधिक कमाई करणारा चित्रपट ठरला होता. या चित्रपटात सलमान आणि भाग्यश्रीची जोडी प्रेक्षकांना खूप आवडली होती. चित्रपटाची कथाच नाही तर त्यातील गाणीही सुपरहिट झाली होती. या चित्रपटातून दोन्ही कलाकार एकाच रात्रीत सुपरस्टार झाले होते.
‘मैने प्यार किया’ होणार पुन्हा प्रदर्शित
राजश्री फिल्मसने आपल्या अधिकृत इ्न्स्टाग्राम अकाउंटवर माहिती देत ‘मैने प्यार किया’ पुन्हा एकदा थिएटरमध्ये रिलीज करणार असल्याची माहिती दिली आहे. सिनेरसिकांच्या मनात स्थान मिळवणाऱ्या प्रेम आणि सुमनची प्रेम कहाणी 23 ऑगस्ट रोजी मोठ्या पडद्यावर दिसणार आहे. हा चित्रपट पीव्हीआर आणि सिनेपॉलिसमध्ये रिलीज होणार आहे. हा चित्रपट पुन्हा रिलीज होणार असल्याबद्दल भाग्यश्रीनेदेखील आनंद व्यक्त केला आहे.
