सांगली : माजी मंत्री, आमदार सदाभाऊ खोत यांच्या खासगी गाडीवर असणाऱ्या अनिल पवार या चालकाला गाडी अडवून भर चौकात जीवे मारण्याचा प्रयत्न करण्यात आला असून या प्रकरणात इस्लामपूर येथील गुंड शकील गोलंदाज व त्याचा साथीदार सुहेल मुल्ला या दोघांवर इस्लामपूर पोलीस ठाण्यात गुन्हा दाखल झाला आहे. त्यांच्या विरोधात अनिल पवार यांनी फिर्याद दिली आहे.
अनिल पवार यांनी दिलेल्या फिर्यादीत म्हटले आहे की, विधानपरिषद आमदार सदाभाऊ खोत यांचे खाजगी वाहन (क्र. एम. एच 10 डी एल 1015) या वाहनावर चालक आहे. काल शनिवारी दुपारी 3.15 वाजता पवार व स्वप्नील सुर्यवंशी असे दोघे वाहनात पेट्रोल भरण्यासाठी वाघवाडी रोडला असलेल्या प्रतिक पेट्रोल पंपावर जात असता समोरून एक चारचाकी (वाहन क्र. एम एच 43 ए ई 0007) या वाहनावरील चालकाने क्रॉस मारून अडवले.
तुमच्या हक्काचे ‘सुराज्य डिजिटल’ फेसबुक पेज, ट्विटर, शेअरचॅट आणि ‘टेलिग्राम’वरही उपलब्ध
या वाहनात येथील गुंड शकील गोलंदाज व त्याच्यासोबत त्याचा साथीदार सुहेल मुल्ला हे होते. ते दोघे वाहनाजवळ आले व शकील गोलंदाज याने शिवीगाळ केली. त्यावेळी गोलंदाज याचा साथीदार सुहेल मुल्ला अरे बघतोस काय, मार त्याला’ असे ओरडला. त्यावेळी गोलंदाज त्याचेकडील चाकू काढून माझ्या पोटात मारत असताना मी तो वार चुकवला. गोलंदाजला धक्का मारून बाजूला ढकलून गाडीत बसलो. त्या क्षणी त्यावेळी मी गाडी रिव्हर्स घेवून तेथून वाघवाडी रोडने निघून गेल्याचे फिर्यादीत म्हटले आहे.
याप्रकरणी इस्लामपूर पोलीस ठाण्यात कलम 307 नुसार गोलंदाज व त्याचा साथीदार याच्यावर गुन्हा दाखल केला आहे. गोलंदाजला पोलिसांनी अटक केली आहे. गोलंदाजला न्यायालयाने चार दिवसांची पोलीस कोठडी सुनावली आहे. त्याचा साथीदार सोहेल मुल्ला हा अद्याप फरार आहे. त्याचा शोध सुरू असल्याचे पोलिसांनी सांगितले आहे. शकील गोलंदाज हा सराईत गुन्हेगार आहे. त्याच्यावर इस्लामपूर पोलीस ठाण्यात जवळपास 10 जबरी गुन्ह्यांची नोंद आहे.
