सोलापूर, 29 मे (हिं.स.)।
कोरोना विषाणूचे रुग्ण आढळत असताना रक्तदाब, मधुमेह व अन्य आजार असलेल्या कोमॉर्बिड रुग्णांनी सावध राहण्याची गरज आहे. कोरोनाचे रुग्ण सात्तत्याने आढळत आहेत. अनेक वेळा रुग्णांची संख्या तुरळक असते तेव्हा त्यास स्पोरॅडीक स्थिती मानली जाते. कोरोनाचे रुग्ण आढळत असल्याचे अहवाल समोर येऊ लागले आहेत.
सोलापुरातील छत्रपती शिवाजी महाराज सर्वोपचार रुग्णालयातही याबाबत तयारी पूर्ण करण्यात आली आहे. दरम्यान, महापालिकेने शहरातील खासगी दवाखान्यांना कोरोना रुग्णांबाबत दैनंदिन माहिती सादर करण्याच्या सूचना दिल्या आहेत.
अश्विनी हॉस्पिटलमध्ये फुफ्फुस आजारांबाबत दाखल होणाऱ्या रुग्णांची कोरोना चाचणी केली जाते. इतर आजारांसाठी दाखल झालेल्या रुग्णांमध्ये सात वयोवृद्ध रुग्ण हे कोरोनाबाधित असल्याचे चाचणीत स्पष्ट झाले. पण, याशिवाय शहरात कुठेही कोरोनाचा एकही रुग्ण आढळून आला नाही. या पध्दतीचे तुरळक संसर्ग वातावरणातील बदलामुळे होणाऱ्या ताप व सर्दीसमवेत आढळत असतात. पण आता कोरोनाचा प्रसार पुन्हा वेगाने होईल का अशी आशंका समोर येऊ लागली आहे.
देशातील विविध शहरात कोरोना रुग्णांची संख्या समोर येऊ लागली आहे. या स्थितीत कोरोनाचा संसर्ग झाला तरी सर्वाधिक नुकसान कोमॉर्बिड लोकांचे होते. कारण या व्यक्तींना पूर्वीचे रक्तदाब, मधुमेहासारखे आजार असतात. या आजाराचे प्रमाण वाढले असेल व त्यात कोरोना झाला तर गुंतागुंत होऊ शकते.
मागील कोरोना लाटेत देखील कोमॉर्बिड व्यक्तीचे सर्वाधिक नुकसान झाले. या स्थितीत पुन्हा कोरोनाच्चा संसर्ग वाढल्यास कोमॉबिंड लोकांची काळजी घ्यावी लागणार आहे.
