नवी दिल्ली, 5 जून (हिं.स.) –
तिन्ही सैन्य दलांच्या केवळ महिला सदस्यांचा समावेश असलेला सागरी मोहिमेचा चमू बुधवार, 4 जून रोजी मायदेशी परतला. या चमूने सेशेल्सपर्यंतचा 1,800 सागरी मैलांचा ऐतिहासिक आंतरराष्ट्रीय प्रवास पूर्ण केला. या ऐतिहासिक मोहिमेला 7 एप्रिल रोजी प्रारंभ झाला होता. भारतीय सशस्त्र दलातील केवळ महिला सदस्यांचा समावेश असलेल्या चमून केलेली ही आंतरराष्ट्रीय खुल्या समुद्रातील ही पहिली मोहीम ठरली आहे.
लष्करी अभियांत्रिकी महाविद्यालयाचे कमांडंट, लेफ्टनंट जनरल ए. के. रमेश यांनी या मोहिमेला मुंबईत झालेल्या औपचारिक समारंभात झेंडा दाखवून रवाना केले होते. ही मोहीम लिंगभाव समावेशक कार्यान्वयनीन उत्कृष्टतेच्या वाटचातील एक मैलाचा दगड असल्याचे त्यांनी म्हटले आहे. या मोहिमेत सहभागी झालेल्या चमूचे धैर्य आणि दृढनिश्चयाचेही त्यांनी कौतुक केले. सशस्त्र दलांच्या परिचालन क्षमतेत महत्वाचे योगदान देणाऱ्यांमध्ये महिलांची भूमिका वाढत असल्याचेही त्यांनी नमूद केले.
त्रिवेणी (56 फुटांची पाल नौका – sailing yacht) या स्वदेशी बनावटीच्या भारताच्या सशस्त्र दलाच्या सेवेतील जहाजावरून लष्कर, नौदल आणि वायुसेनेतील 11 महिला अधिकाऱ्यांच्या चमूने जवळपास दोन महिने खुल्या समुद्रातील आव्हानात्मक परिस्थितीचा सामना करत ही मोहिम पूर्ण केली. समुद्री वाऱ्याच्या तीव्र झडपा, सातत्याने बिघडणारी सागरी स्थिती आणि दीर्घकाळ थकवा सहन करत, या चमूने विलक्षण सहनशक्ती आणि अतूट दृढनिश्चयाचे दर्शन घडवले. या चमूत सहभागी असलेल्या अधिकाऱ्यांची नावे खाली दिली आहेत. :
– भारतीय लष्कर : लेफ्टनंट कर्नल अनुजा, मेजर करमजीत, मेजर तान्या, कॅप्टन ओमिता, कॅप्टन दौली आणि कॅप्टन प्राजक्ता
– भारतीय नौदल : लेफ्टनंट कमांडर प्रियांका
– भारतीय वायुसेना : स्क्वाड्रन लीडर विभा, स्क्वाड्रन लीडर श्रद्धा, स्क्वाड्रन लीडर अरुवी आणि स्क्वाड्रन लीडर वैशाली
या मोहिमेदरम्यान सेशेल्समधल्या थांब्याच्या वेळी या चमूने उच्च-स्तरीय संरक्षण विषयक आणि राजनैतिक कार्यक्रमांमध्येही सहभाग नोंदवला. याअंतर्गत त्यांनी सेशेल्सचे परराष्ट्र व्यवहार मंत्री, संयुक्त संरक्षण दलांचे प्रमुख आणि सेशेल्समधील भारताचे उच्चायुक्त यांच्याशी औपचारिक संवादही साधला. या कार्यक्रमांमुळे या चमूला आपली सागरी मुत्सद्देगिरी अधिक सक्षम करण्यात मदत झाली, तसेच हिंद महासागरातील बेट स्वरुपातील राष्ट्रांसोबत भारताची धोरणात्मक भागीदारीही अधिक विस्तारली.
