विजापूर आणि कांकेर येथे घडल्या चकमकी
रायपूर, 20 मार्च (हिं.स.) : छत्तीसगडच्या विजापूर आणि कांकेर येथे घडलेल्या 2 वेगवेगळ्या चकमकींमध्ये 24 नक्षलवादी ठार झाले असून विजापूर जिल्हा राखीव रक्षकचा (डीआरजी) एक जवान हुतात्मा झाला आहे.
यासंदर्भात माहिती देताना पोलिसांनी सांगितले की, विजापूरमध्ये झालेल्या चकमकीत 20 नक्षलवादी ठार झाले आहेत. दुसरीकडे कांकेरमध्ये सैनिक आणि नक्षलवाद्यांमध्ये चकमक झाली, ज्यामध्ये 4 नक्षलवादी ठार झाले. सर्व 24 नक्षलवाद्यांचे मृतदेह सापडले आहेत. शस्त्रास्त्रे आणि दारूगोळा जप्त करण्यात आला आहे. विजापूर आणि दंतेवाडा सीमेजवळील गांगलूर पोलिस स्टेशन हद्दीतील माओवादी विरोधी कारवाईसाठी एक संयुक्त पथक निघाले होते. या कारवाईदरम्यान आज सकाळी 7 वाजेपासून नक्षलवादी आणि सुरक्षा दलांमध्ये गोळीबार सुरू होता. चकमक स्थळावरून 20 नक्षलवाद्यांचे मृतदेह आणि मोठ्या प्रमाणात शस्त्रास्त्रे जप्त करण्यात आली आहेत. दुसरीकडे, चकमकीत विजापूर डीआरजीचा एक जवान शहीद झाला आहे. चकमकीनंतर शोधमोहीम सुरू आहे.
छत्तीसगडमधील चकमकींबाबत ट्विटरवर (एक्स) प्रतिक्रिया देताना केंद्रीय गृहमंत्री म्हणाले की, ‘नक्षलमुक्त भारत अभियाना’च्या दिशेने आज आपल्या जवानांनी आणखी एक मोठे यश मिळवले आहे. छत्तीसगडमधील विजापूर आणि कांकेरमध्ये आमच्या सुरक्षा दलांनी केलेल्या 2 वेगवेगळ्या ऑपरेशनमध्ये 24 नक्षलवादी मारले गेले. केंद्र सरकार नक्षलवाद्यांविरोधात कठोर दृष्टिकोन ठेवून पुढे जात आहे आणि आत्मसमर्पण करण्यापासून आत्मसात करण्यापर्यंतच्या सर्व सोयी असूनही आत्मसमर्पण न करणाऱ्या नक्षलवाद्यांविरोधात झीरो-टॉलरन्सचे धोरण स्वीकारत आहे. पुढील वर्षी 21मार्चपूर्वी देश नक्षलमुक्त होईल असा विश्वास त्यांनी व्यक्त केला
