पुणे, 10 मे (हिं.स.)।
पुण्यात राहणाऱ्या एका तरुणीने इन्स्टाग्राम अकाऊंटवर ‘पाकिस्तान जिंदाबाद’ असे स्टेटस ठेवत भारताविषयी आक्षेपार्ह पोस्ट केली आहे. याप्रकरणी कोंढवा पोलीस ठाण्यात गुन्हा दाखल करण्यात आला आहे. खतीजा शहाबुद्दीन शेख (१९, रा. कौसरबाग, कोंढवा) असे गुन्हा दाखल झालेल्या युवतीचे नाव आहे.
याप्रकरणी पोलीस हवालदार सुभाष महादेव जरांडे यांनी फिर्याद दिली आहे. तिच्यावर भारतीय न्यायसंहिता कलम १५२, १९६, १९७, २९९, ३५२, ३५३ अन्वये कायदेशीर फिर्याद आहे.
गुन्हा दाखल करताना धर्म, समूह यांच्यामध्ये शत्रुत्व व द्वेषाची भावना वाढेल, तसेच भारत देशाच्या राष्ट्रीय एकात्मतेला बाधक ठरेल व सार्वभौमत्व, एकता व अखंडता धोक्यात आणणारी कृती होईल अशा दृष्टीने वरील मेसेज बुध्दीपुरस्सर प्रसारीत करुन विव्देषपुर्वक कृत्य केल्याचे नमूद करण्यात आले आहे.
दरम्यान, खतिजा ही सिंहगड इन्स्टिट्यूटमध्ये शिक्षण घेत होती. मात्र या प्रकारानंतर तिला महाविद्यालयाने काढून टाकले आहे. पोलिसांनी दिलेल्या माहितीनुसार, युद्धजन्य परिस्थितीत समाज माध्यमात तेढ निर्माण करणारे, तसेच अफवा प्रसारित करणाऱ्या संदेशांवर पोलिसांकडून लक्ष ठेवले जात असल्याचे पोलिस प्रशासनाने यापूर्वीच जाहीर केलेले आहे. शुक्रवारी दुपारी पोलीस कर्मचारी जरांडे हे पोलिस ठाण्यात हजर होते.त्यावेळी संबंधित तरुणीच्या समाजमाध्यमावर पाकिस्तान झिंदाबाद असा मजकूर प्रसारित झाल्याचे त्यांच्या निदर्शनास आले. तिच्या या मजकुरामुळे समाजमाध्यमात तेढ निर्माण होऊ शकते असे लक्षात आल्यानंतर वरिष्ठ पोलिस निरीक्षक विनय पाटणकर यांच्या मार्गदर्शनाखाली तिच्यावर अटकेची कारवाई करण्यात आली.
