त्र्यंबकेश्वर, 27 एप्रिल (हिं.स.)।
आगामी सिंहस्थ कुंभमेळ्याच्या दृष्टीने त्र्यंबकेश्वरमध्ये २७५ कोटींची विविध विकासकामे करण्यात येणार आहे. तीर्थक्षेत्र विकास योजनेंतर्गत सिंहस्थ कुंभमेळा डोळ्यासमोर ठेवत तयार केलेल्या आराखड्यातील कामांना उच्चस्तरीय बैठकीत मान्यता देण्यात आली.
राज्याच्या मुख्य सचिव सुजाता सौनिक यांच्या अध्यक्षतेखाली दूरदृश्य प्रणालीच्या माध्यमातून ही बैठक नुकतीच पार पडली. यावेळी विभागीय महसूल आयुक्त डॉ. प्रवीण गेडाम, जिल्हाधिकारी जलज शर्मा, त्र्यंबकेश्वर नगरपालिकेच्या मुख्याधिकारी श्रेया देवचक्के यांच्यासह विविध विभागांचे अधिकारी उपस्थित होते,
दरम्यान, त्र्यंबकेश्वरला ‘अ’ वर्ग तीर्थक्षेत्राचा दर्जा मिळाला असून त्याअनुषंगाने कुंभमेळ्यासाठी त्र्यंबकेश्वर नगरपालिकेने १ हजार, १५० कोटींचा आराखडा तयार केला. या आराखड्यातीन २७५ कोटींची कामे तीर्थक्षेत्र विकास योजनेंतर्गत करण्यावर बैठकीत शिक्कामोर्तब करण्यात आले. तर उर्वरित कामे संबंधित विभागांच्या योजनेत समाविष्ट करण्याचे सूचित करण्यात आले.
यामध्ये तीन एकर जागेवर वाहनतळ प्रस्तावित असून याठिकाणी काही दुकानांचे नियोजन आहे. तर उर्वरित ९० टक्के जागा वाहनतळासाठी वापरली जाईल, असे नियोजन करण्याचे सौनिक यांनी सूचित केले. त्याचप्रमाणे दुकानांची संख्या वाढल्यास वाहनतळासाठी पुरेशी जागा मिळू शकणार नसल्याचा मुद्दाही बैठकीत मांडला गेला.त्र्यंबकेश्वर मधील आराखड्यामध्ये सिंहस्थ कुंभमेळा आराखड्यात दर्शन पथ, नवीन रस्त्यांचे बांधकाम, घाटांचे नूतनीकरण, स्वागत कमानींची उभारणी, सुशोभीकरण, नदी संवर्धन, घनकचरा प्रकल्प उभारणी, त्र्यंबकेश्वर वाढीव पाणीपुरवठा योजना, वाहनतळ उभारणी आदि कामांचा समावेश आहे. यातील कोणती कामे तीर्थक्षेत्र विकास योजनेत समाविष्ट करण्यात आली. याबाबतची माहिती बैठकीचे इतिवृत्त प्राप्त झाल्यानंतर समोर येईल, असे अधिकारी वर्गाकडून सांगण्यात आले
