नाशिक, 20 मार्च (हिं.स.) : उपनगर परिसरात पूर्व वैमानसतून दोन सख्ख्या भावांचा खून केल्याची घटना रंगपंचमीच्या दिवशी रात्री घडल्यामुळे नाशिक शहरात चांगलीच खळबळ उडाली आहे येथील आरोपींना पोलिसांनी अटक केली आहे. पूर्ववैमनस्य व वर्चस्वाच्या वादातून झालेल्या या धक्कादायक घटनेत राष्ट्रवादी काँग्रेस (अजित पवार) गटाचे उपाध्यक्ष उमेश तथा मन्ना भगवान जाधव (वय ३२) व त्यांचे भाऊ प्रशांत भगवान जाधव (वय ३०, दोघे रा. आंबेडकरवाडी, नाशिक) या दोघांना प्राण गमवावे लागले. या घटनेने आंबेडकरवाडी परिसरात तणाव व शोकाकूल वातावरण असून, पोलिसांनी रात्री उशिरा ५ मारेकऱ्यांना ताब्यात घेतले आहे. शहरातील रंगोत्सव निर्विघ्नपणे पार पडल्याने विसावलेल्या पोलीस दलाची या घटनेमुळे धावपळ उडाली होती.
नाशिक-पुणे रोडवरील बोधलेनगर परिसरात असलेल्या आंबेडकरवाडी येथे रात्री साडेनऊ वाजता ही घटना घडली. पोलिसांनी दिलेल्या माहितीनुसार, तसेच मयत जाधव बंधू यांचे मामा विनोद धोंडीराम पवार यांनी दिलेल्या फिर्यादीनुसार, रात्री साडे नऊ वाजता आंबेडकरवाडी परिसरात बनकर चौक पिठाच्या गिरणीजवळ जाधव बंधू तसेच नितीन हटकर, मयूर भोये, आदित्य व विनोद पवार हे आगामी डॉ. बाबासाहेब आंबेडकर जयंती उत्सव साजरा करण्यासंदर्भात चर्चा करीत होते. यादरम्यान उमेश यास फोन आला. आईने घरी जेवणासाठी बोलावल्याने उमेश घरी जाऊ लागला. उमेश जाधव हे सार्वजनिक शौचालयाजवळून घरी परतत असताना त्यांना काही जण मारहाण करीत असल्याचे दिसले. हे पाहून त्यांचे भाऊ प्रशांत जाधव हे भावाला वाचविण्यासाठी धावून गेले.
तेव्हा शस्त्रधारी मारेकऱ्यांनी उमेश जाधव यांच्यासह प्रशांत जाधव यांच्यावरही प्राणघातक हल्ला चढविला. कोणी मध्ये आले तर संपवून टाकू, अशी धमकी मारेकऱ्यांनी दिल्याने जाधव बंधू यांच्या सोबत असलेले सहकारी दहशतीने बाजूला झाले. उमेश व प्रशांत यांच्यावर धारदार शस्त्राने वार केल्याने ते गंभीर जखमी झाल्यानंतर मारेकरी दुचाकीने पळून गेले. त्यानंतर जाधव बंधूंना सहकाऱ्यांनी प्रथम खासगी व नंतर जिल्हा शासकीय रुग्णालयात उपचारासाठी नेले; मात्र उपचारापूर्वीच त्यांची प्राणज्योत मालवली होती. या घटनेचे वृत्त समजताच पोलीस उपायुक्त मोनिका राऊत, सहाय्यक पोलीस आयुक्त डॉ. सचिन बारी, वरिष्ठ पोलीस निरीक्षक मधुकर कड, उपनगर पोलीस ठाण्याचे वरिष्ठ पोलीस निरीक्षक जितेंद्र सपकाळे, पोलीस निरीक्षक संजीव फुलपगारे, गुन्हे शोध पथकाचे पोलीस उपनिरीक्षक प्रभाकर सोनवणे आदींनी कर्मचाऱ्यांसह घटनास्थळी धाव घेतली. यावेळी आंबेडकरवाडीत तणावाचे वातावरण होते. जाधव बंधूंचा मृत्यू झाल्याचे समजताच जिल्हा शासकीय रुग्णालयात शोकाकुल नातेवाईक, तसेच मित्र परिवाराने गर्दी केली होती. घटनेचे गांभीर्य लक्षात घेऊन पोलिसांनी तातडीने तपासाची सूत्रे हलविली. रात्री उशिरा गुन्हे शाखा युनिट-१ च्या पथकाने पाच आरोपींना ताब्यात घेतले. याप्रकरणी रात्री उशिरा उपनगर पोलीस ठाण्यात गुन्हा दाखल करण्यात आला असून, पुढील तपास पोलीस निरीक्षक संजीव फुलपगारे करीत आहेत.
