चेन्नई, 13 एप्रिल (हिं.स.)।उपमुख्यमंत्री एकनाथ शिंदे यांच्याबाबत विडंबनात्मक गाणं तयार करुन स्टँडअप कॉमेडियन कुणाल कामराने त्यांच्यावर टीका केली होती. त्यानंतर त्याच्यावर राज्यातील विविध ठिकाणी गुन्हे दाखल करण्यात आले.त्यानंतर शिंदे गटाच्या कार्यकर्त्यांने कामराला फोन करत धमकी दिली होती. कुणालने तो तामिळनाडूमध्ये असल्याचं सांगितल्यावर तमिळनाडू कसं पोहोचायचं भाऊ? असं शिंदे गटाच्या कार्यकर्त्याने म्हटलं होतं. ही ऑडिओ क्लिप प्रचंड व्हायरल झाली आणि अनेक मिम्स व्हायरल झाले. अशातच आता प्रसिद्ध दाक्षिणात्य अभिनेते प्रकाश राज यांनी शिंदेंना डिवचल्याचं पाहायला मिळालं.
कुणाल कामराची प्रसिद्ध प्रकाश राज यांनी भेट घेतली. त्यांनी कुणालसोबतचा फोटो सोशल मीडियावर पोस्ट केला. फोटोसोबत प्रकाश राज यांनी खोचक कॅप्शन देखील दिले आहे. “तमिळनाडू कसं पोहोचायचं भाऊ? सिम्पल ऑटोने” असं म्हटलं. फोटोमध्ये प्रकाश राज आणि कुणाल कामरा यांनी सारख्याच रंगाचा शर्ट परिधान केल्याचं दिसतंय. हिंदी आणि दक्षिणेतील चित्रपटांमध्ये कधी खलनायक तर कधी कॉमिक पात्र साकारणारे प्रकाश राज सरकारविरुद्ध बोलून चर्चेत राहतात. ते कायम निर्भयपणे आपले विचार व्यक्त करत असतात. आता पुन्हा ते फोटोला दिलेल्या कॅप्शनमुळे चर्चेत आले आहेत.
कुणाल याआधीही वादात अडकला होता. पत्रकार अर्णब गोस्वामी याच्याबरोबरही कुणाल कामराचा वाद झाला होता.आता एकनाथ शिंदे यांच्यासोबत झालेल्या वादात कुणालने हार मानली नसून तो सोशल मीडियावर सतत पोस्ट आणि व्हिडीओ शेअर करताना दिसत आहे. तसेच याप्रकरणी माफी मागणार नसल्याचेही त्याने स्पष्ट केले.
