खास प्रतिनिधी : कारखान्यातील कामाच्या ठिकाणचे नवर्याचे एका मुलीसोबत असलेले लफडे बिचार्या बायकोला चांगलेच भोवले. या प्रकरणात संबधित मुलीच्या नातेवाईकांमधील संशयित चार महिलांनी सात महिन्याच्या गर्भवती महिलेवर हल्ला करीत अमानुषपणे मारहाण करण्याची धक्कादायक घटना घडली आहे. सोलापुरातील तुळजाई नगर भागात ही घटनी घडली. येथील अक्कलकोट रोड एमआयडीसी पोलीस ठाण्यात याप्रकरणी गुन्हा दाखल झाला आहे. येथे घडलेल्या मानवतेला काळीमा फासणार्या या घटनेबद्दल तीव्र संताप व्यक्त केला जात आहे.
विशेषत्वे, पोलीसांच्या प्राथमिक तपासात सकृतदर्शनी मुलीसोबतच्या ऐनितीक संबंधावरुनच या महिलेस घरी येऊन मारहाण केल्याचे स्पष्ट होत आहे. तशी माहिती अक्कलकोट रोड एमआयडीसी पोलिस ठाण्याच्या सुत्रांनी दिली आहे. नेमकं काय घडलं?
सोलापुरात एका गर्भवती महिलेला निर्दयीपणे मारहाण करण्यात आली. शिल्पा कृष्णा मिस्किन (वय 24 रा. तुळजाई नगर) असे मारहाण झालेल्या गर्भवती महिलेचे नाव आहे. तिला पोटावर आणि पाठीवर लाथाबुक्यांनी गंभीर मारहाण करण्यात आली आहे, असा आरोप तिच्या कुटुंबियांनी केला आहे.
या घटनेबाबत शिल्पा यांची सासू प्रभावती मिस्कीन यांनी सांगितले की, माझा मुलगा एका कारखान्यात कामाला आहे. त्याच्या कामाच्या ठिकाणी असलेली एक मुलगी सतत त्याच्याशी बोलण्याचा प्रयत्न करत होती. काही दिवसांपूर्वी त्या दोघ एकमेकांशी बोलत असताना मुलीच्या कुटुंबियांनी पाहिले. त्यांच्या कुटुंबियांना याच गोष्टीचा राग आला. त्या मुलीच्या नातेवाईकांनी माझ्या घरी येऊन माझा मुलगा आणि सूनेला शिवीगाळ केली. त्यानंतर तिला लाथाबुक्यांनी मारहाण करण्यास सुरुवात केली. गर्भवती असूनही तिच्या पोटावर आणि पाठीवर गंभीर इजा होईल अशा पद्धतीने मारहाण करण्यात आली. असे प्रभावती मिस्कीन म्हणाल्या.
सीसीटीव्ही फुटेजवरुन येईल मारहाणीचे सत्य समोर
या मारहाण प्रकरणी प्रभावती मिस्कीन यांनी सांगितले की, आमची काही चूक नसताना संबंधितांनी घरी येऊन मारहाण केली. इतकेच नव्हे तर, आम्हाला मारहाण करून पोलीस स्टेशनमध्ये आमच्या नावाची तक्रार देण्याचा प्रयत्न केला. आमच्या घरासमोर सीसीटीव्ही कॅमेरा आहे. पोलिसांनी आणि माध्यमांनी याची पडताळणी करावी, अशी विनंती प्रभावती मिस्कीन यांनी केली आहे.
संशियांताना लवकरच होईल अटक
या मारहाणीत जखमी झालेल्या शिल्पा यांच्यावर सुरुवातीला सोलापूर शासकीय रुग्णालयात उपचार सुरू असल्याची माहिती मिळाली होती. मात्र, आता त्यांची प्रकृती स्थिर असून त्यांच्यावर शहरातील एका खासगी रुग्णालयात त्यांच्यावर उपचार सुरू आहेत. या घटनेनंतर मारहाण करणार्या महिलांच्या विरोधात एमआयडीसी पोलीस ठाण्यात तक्रार नोंदवण्यात आली आहे. पोलिसांनी या प्रकरणाचा अधिक तपास सुरू केला आहे. या महिलेच्या पतीचे आणि एका मुलीचे अनैतिक संबंध असल्याच्या संशयावरून तिच्या घरच्यांनी ही मारहाण केल्याचा आरोप करण्यात आला आहे. या पार्श्वभूमीवर पोलीस तपास करीत आहेत.लवकरच आरोपींना अटक होईल, असे पोलिसांनी म्हटले आहे.
