बीजापूर, ७ जून (हिं.स) : छत्तीसगडच्या बीजापूर जिल्ह्यात गेल्या तीन दिवसांपासून सुरू असलेल्या नक्षलवादविरोधी कारवाईदरम्यान सात नक्षलवादी ठार झाले असून 3 जवान जखमी आहेत. यामध्ये नक्षलवाद्यांचे 2 वरिष्ठ नेतेही ठार झाल्याची माहिती पोलिसांनी दिली. ही मोहीम इंद्रावती नॅशनल पार्कच्या घनदाट जंगलात राबवली जात आहे. सुरक्षा दलांनी या भागात 7 नक्षलवाद्यांचे मृतदेह सापडल्याचे स्पष्ट केले.
ठार झालेल्यांमध्ये माओवाद्यांच्या सेंट्रल कमिटीचा सदस्य नरसिंहा चालम उर्फ सुधाकर आणि तेलंगणा राज्य समितीचा विशेष विभाग सदस्य भास्कर उर्फ मैलारापू अडेल्लू यांचा समावेश आहे.सुधाकरच्या विरोधात ४० लाख रुपयांचे तर भास्करवर छत्तीसगड आणि तेलंगणा सरकारकडून एकत्रित ४५ लाख रुपयांचे बक्षीस जाहीर करण्यात आले आहे.नक्षलवाद्यांविरोधातील ही कारवाई सुरक्षा दलांसाठी मोठे यश मानले जात आहे. तसेच राज्यात नक्षलवादी हालचाली रोखण्याच्या दिशेने ही मोहीम निर्णायक ठरू शकते, असे अधिकार्‍यांचे म्हणणे आहे.
—————–
