सोलापूर : सोलापूर जनता सहकारी बँकेच्या निवडणुकीत सत्ताधारी परिवार पॅनलचे सर्वच्या सर्व उमेदवार आघाडीवर असून बँकेवर पुन्हा एकदा संघ परिवाराचेच वर्चस्व असल्याचे सिद्ध झाले आहे.
या निवडणुकीत परिवार पॅनलने सर्व 17 जागांसाठी 17 उमेदवार उभे केले होते. हे सर्व ऊमेदवार तिसऱ्या फेरीअखेर विजयाच्या ऊंबरठ्यावर आहेत. रात्री उशिरापर्यंत मतमोजणी सुरू होती. अधिकृत निकाल उद्या जाहीर होणार आहे.
मल्टीस्टेट शेड्युल्ड दर्जा असलेल्या सोलापूर जनता सहकारी बँकेच्या संचालक मंडळाच्या 17 सदस्यांची निवड करण्यासाठी रविवारी ( ता. 14 मार्च) मतदान झाले. मतदान कमी झाले तरीही सभासदांनी सत्ताधारी पॅनेललाच झुकते माप दिल्याचे मतमोजणी नंतर दिसून येत आहे. कारण विरोधी बचाव परिवाराचे उमेदवार आणि सत्ताधारी उमेदवार यांच्यात खूप मोठ्या मतांची तफावत दिसून येत आहे. यावरून मतदारांनी एकतर्फी मतदान करून सत्ताधाऱ्यांच्याच हातात पुन्हा सत्ता दिली आहे.
तुमच्या हक्काचे ‘सुराज्य डिजिटल’ फेसबुक पेज, ट्विटर, कू ॲपवर आणि ‘टेलिग्राम’वरही उपलब्ध
सोलापूर महापालिकेपासून 25 किलोमीटरचे क्षेत्रासाठी 10 संचालक, महापालिकेपासून 25 किलोमीटर बाहेरील क्षेत्रासाठी 4 संचालक, महिला प्रवर्गातून 2 संचालक आणि अनुसूचित जाती जमाती प्रवर्गातून एक उमेदवार अशा एकूण 17 संचालकांची निवड सभासदांनी केली आहे.
* सभासदांनी मतदानाकडे फिरवली पाठ
वाढते ऊन आणि वाढता कोरोनाच्या पार्श्वभूमीवर मतदारांनी पर्यायाने बँकेच्या सभासदांनी मतदानाकडे पाठ फिरविल्याचे दिसून आले होते. कारण बँकेचे सोलापूर एकूण 53 हजार 538 मतदार मतदानासाठी पात्र असतानाही अवघ्या 14 हजार 151 मतदारानांनी मतदानाचा हक्क बजावला आहे. एकूण 26.43 टक्के मतदान झाले.
“परिवार पॅनलच्या माध्यमातून उच्चशिक्षित सेवाभावी, कर्तव्यदक्ष व प्रशासकीय अनुभव असणारे उमेदवार उभे केले होते. त्या सर्व उमेदवारांना मतदारांनी भरभरून मतदान करून प्रचंड बहुमताने निवडून दिलेे. रा.स्व.संघाच्या प्रेरणेतून व मार्गदर्शनाखाली निवडून आलेले सर्व उमेदवार चांगली कामगिरी करतील”
– किशोर देशपांडे, पॅनल प्रमुख, परिवार पॅनल
