मुंबई : बॉलीवूड दिग्दर्शक राकेश रोशन यांच्यावर साल २००० मध्ये झालेल्या हल्ल्यात सहभागी गुन्हेगार आणि शार्पशूटरला ठाणे येथून अटक करण्यात आली आहे. हा गुन्हेगार तीन महिन्यांपूर्वी पॅरोलवरून फरार झाला होता. सुनील गायकवाड असं अटक केलेल्या आरोपीचं नाव असून कळवा येथील प्रशिक सर्कल भागातून शुक्रवारी रात्री ९ च्या सुमारास अटक करण्यात आल्याची माहिती पोलिसांनी दिली.
एका वरिष्ठ पोलीस अधिकाऱ्यांनी दिलेल्या माहितीनुसार, या आरोपीविरूद्ध ११ खुनाची प्रकरणंं आणि ७ खुनाचा प्रयत्न करण्याचे गुन्हे दाखल आहेत. यापैकी एक प्रकरण म्हणजे दिग्दर्शक राकेश रोशन यांच्यावर २००० मध्ये करण्यात आलेला प्राणघातक हल्ला. जानेवारीमध्ये, मुंबईच्या सांताक्रूझ येथील राकेश यांच्या ऑफिसच्या बाहेर त्यांच्यावर गोळ्या झाडण्यात आल्या होत्या. यानंतर पोलिसांनी सुनील गायकवाडला अटक केली होती.
अधिकाऱ्यांनी सांगितलं की, एका खून प्रकरणात गायकवाडला जन्मठेपेची शिक्षा सुनावण्यात आली आहे. यानंतर त्याला नाशिकच्या मध्यवर्ती कारागृहात दाखल करण्यात आलं. २६ जून रोजी २८ दिवसांच्या पॅरोलवर बाहेर आला होता. पॅरोल संपल्यानंतर तो तुरुगांत परत न येता फरार झाला. बराच शोध घेतल्यानंतर शुक्रवारी रात्री पोलिसांनी त्याला ताब्यात घेतलं.
तुमच्या हक्काचे ‘सुराज्य डिजिटल’ फेसबुक पेज, ट्विटर, शेअरचॅट आणि ‘टेलिग्राम’वरही उपलब्ध
पोलिसांनी दिलेल्या माहितीनुसार, गायकवाड हा १९९९- २००० या वर्षात अनेक गुन्ह्यांमध्ये सहभागी होता. तो अली बुदेश आणि सुभाषसिंग ठाकूर यांच्या टोळीचा सदस्य आहे. सुनील गायकवाडचा नाशिक दरोड्यातही हात आहे. पोलीस लवकरच सुनीलला पंत नगर पोलिसांच्या स्वाधीन करतील, त्यानंतर त्याला तुरूंगात पाठविण्यात येणार असल्याचे सांगितले.
