सोलापूर : सोलापुरात पूर्वभागात साकारणाऱ्या स्वर्गीय बाळासाहेब ठाकरे यांच्या स्मारकासाठी ४ कोटी रूपयांचा निधी लवकरच दिला जाईल अशी घोषणा राज्याचे नगरविकास मंत्री एकनाथ शिंदे यांनी सोलापुरात केली. तसेच पाणीपुरवठा योजना, उड्डाणपूल, रस्ते विकास आदी प्रकल्प सोलापूरसाठी अत्यंत महत्त्वाचे असून भूसंपादनाअभावी कुठलेही प्रकल्प रखडू देणार नाही, अशी ग्वाही नगरविकास मंत्री एकनाथ शिंदे यांनी शनिवारी येथे दिली.
राज्याचे नगरविकासमंत्री एकनाथ शिंदे हे शनिवारी सोलापूर दौऱ्यावर होते. त्यावेळी त्यांनी येथील नियोजन भवनात महापालिकेच्या विकास कामांसंदर्भात आढावा बैठक घेतली. या बैठकीनंतर त्यांनी पत्रकारांशी संवाद साधला त्यावेळी त्यांनी स्मारकाच्या निधीची घोषणा केली. यावेळी आमदार प्रशांत परिचारक, आमदार सुभाष देशमुख, सचिन कल्याणशेट्टी, संजय शिंदे, नगरविकास विभागाचे प्रधान सचिव महेश पाठक, महापौर श्रीकांचन यन्नम, जिल्हा परिषद अध्यक्ष अनिरुद्ध कांबळे, जिल्हाधिकारी मिलिंद शंभरकर, महापालिका आयुक्त पी. शिवशंकर आदी मान्यवर उपस्थित होते.
तुमच्या हक्काचे ‘सुराज्य डिजिटल’ फेसबुक पेज, ट्विटर, कू ॲपवर आणि ‘टेलिग्राम’वरही उपलब्ध
सोलापूर महापालिका, तसेच जिल्ह्यातील विविध नगर परिषदा व नगर पंचायतींच्या प्रकल्पांचा आढावा घेण्यासाठी, तसेच राज्यभरात लागू करण्यात आलेल्या एकात्मिक विकास नियंत्रण व प्रोत्साहन नियमावलीबाबत स्थानिक लोकप्रतिनिधी व प्रशासनाशी संवाद साधण्यासाठी शिंदे सोलापूर येथे आले होते.
यावेळी एकनाथ शिंदे यांच्या हस्ते फ्रंटलाईन वर्कर्सना कोरोना लस देण्याच्या कार्यक्रमाचा शुभारंभ करण्यात आला.
नियोजन भवन येथे झालेल्या बैठकीत शिंदे यांच्यासमोर विविध प्रकल्पांचे सादरीकरण करण्यात आले, तसेच या प्रकल्पांसमोरील अडचणी मांडण्यात आल्या. प्रकल्पांचा आढावा घेतल्यानंतर शिंदे यांनी सोलापूर-उजनी समांतर पाणीपुरवठा योजना, तसेच एनएचएआयने मंजुरी दिलेल्या दोन उड्डाणपुलांच्या प्रकल्पांसाठी आवश्यक असलेल्या भूसंपादनासाठी लागणारा निधी देण्याबाबत मुख्यमंत्री आणि अर्थमंत्र्यांसमवेत चर्चा करून सकारात्मक निर्णय घेण्याची ग्वाही दिली.
शिंदे म्हणाले की, कोव्हीडमुळे राज्याच्या उत्पन्नावरही परिणाम झालेला आहे. त्यामुळे महापालिकेने प्रत्येक गोष्टीसाठी सरकारकडे निधी न मागता उत्पन्नाच्या पर्यायी स्रोतांचा शोध घ्यावा, कल्पक पर्याय वापरावे, तज्ज्ञांची मदत घ्यावी. आरक्षित भूखंड विकसित करण्यासाठी कन्स्ट्रक्शन टीडीआर किंवा एआर पॉलिसीचा वापर करावा, जेणेकरून महापालिकेला एक पैसाही खर्च न करता विकासकामे करता येतील.
तातडीच्या बाबींसाठी निश्चितपणे जमेल तितका निधी देऊ, असे स्पष्ट करतानाच काम सुरू असलेल्या पाणी पुरवठा योजनेचे उर्वरित काम लवकरात लवकर पूर्ण करण्याचे निर्देश त्यांनी दिले. शिवसेनाप्रमुख स्वर्गीय बाळासाहेब ठाकरे यांच्या स्मारकासाठी महापालिकेत ठराव मंजूर झाला आहे. पण महापालिकेची आर्थिक स्थिती नसल्याने स्मारक उभा राहण्यासाठी अडचण येत असल्याची कैफियत सोलापुरातील नगरसेवकांनी बैठकीत मांडली. याची दखल घेत स्मारकाचे काम मार्गी लागण्यासाठी तातडीने ४ कोटी रूपयांचा निधी देण्यात येत असल्याचे मंत्री शिंदे यांनी सांगितले.
