सांगली : कोरोनाबाधित रुग्णांच्या मृतदेहांची प्रचंड हेळसांड सुरू आहे. अंत्यसंस्कार केल्यानंतर अर्धवट जळालेल्या मृतदेहाचे लचके तोडणाऱ्या कुत्र्याचा व्हिडिओ सोशल मीडियात व्हायरल झाल्याने एकच खळबळ उडाली आहे. हा संतापजनक प्रकार इस्लामपूर नगरपरिषदेच्या स्मशानभूमीत घडला आहे. त्याचा व्हिडिओ व्हायरल होतोय.
या प्रकारातून इस्लामपूर नगरपरिषद आणि जिल्हा प्रशासनाचा गलथान कारभार चव्हाट्यावर आला आहे. मृतदेहांवर योग्य पद्धतीने अंत्यसंस्कार होत नसल्याने नागरिकांमधून संताप व्यक्त होत आहे. इस्लामपूर नगरपरिषदेच्या कापुसखेड नाका परिसरातील स्मशानभूमीत कोरोनाबाधित मृतदेहांवर अंत्यसंस्कार केले जातात. गेल्या १५ दिवसांपासून मृतांची संख्या वाढत असल्याने अंत्यसंस्कार करणाऱ्या यंत्रणा कोलमडल्या आहेत.
तुमच्या हक्काचे ‘सुराज्य डिजिटल’ फेसबुक पेज, ट्विटर, शेअरचॅट आणि ‘टेलिग्राम’वरही उपलब्ध
इस्लामपूरमधील गंभीर प्रकार एका मृताच्या नातेवाईकानेच मोबाइलमध्ये चित्रीत करून तो सोशल मीडियात व्हायरल केला. या व्हिडिओत कुत्र्याकडून अर्धवट जळालेल्या मृतदेहाचे लचके तोडले जात आहेत. शिराळा तालुक्यात व्हेंटिलेटरची व्यवस्था नसल्याने नातेवाईकांनी रुग्णाला इस्लामपूर शहरातील एका कोव्हिड उपचार केंद्रात दाखल केले होते. ३४ हजार रुपये भरून घेतल्यानंतरही रुग्णाला व्हेंटिलेटर मिळाले नाही. काल गुरुवारी सकाळी या रुग्णाचा मृत्यू झाला. यानंतर रुग्णालय प्रशासनाने मृतदेह अंत्यसंस्कारासाठी इस्लामपूर नगर परिषदेच्या कर्मचाऱ्यांकडे सोपवला.
* कुटुंबीयास दिसला धक्कादायक प्रकार
नगर परिषदेच्या कर्मचाऱ्यांनी घाईगडबडीत अंत्यसंस्काराचे सोपस्कार उरकले. यानंतर दुसरा मृतदेह आणण्यासाठी ते निघून गेले. दरम्यान, स्मशानभूमीत आलेल्या नातेवाईकांना अर्धवट जळालेला मृतदेह पाहून धक्का बसला. गंभीर बाब म्हणजे एक भटके कुत्रे अर्धवट जळालेल्या मृतदेहाचे लचके तोडत होते. हा सर्व प्रकार पाहून नातेवाईकांनी मोबाइलवर चित्रीकरण केले.
या व्हिडिओद्वारे त्यांनी पालकमंत्री जयंत पाटील आणि जिल्हा प्रशासनाला जाब विचारला आहे. उपचाराअभावी रुग्णांना जिवंतपणी नरकयातना भोगाव्या लागत आहेत. मृत्यूनंतर त्यांचा अखेरचा प्रवास तरी योग्य पद्धतीने व्हावा, अशी अपेक्षा नातेवाईकांनी व्यक्त केली आहे. तसेच मृतदेहांची हेळसांड होण्यासाठी पालकमंत्री की प्रशासन जबाबदार आहे, असा सवालही त्यांनी उपस्थित केला आहे.
