वळसंग हद्दीत आराम बस उलटून एक ठार, सहा जखमी

सोलापूर : दक्षिण सोलापूर तालुक्यातील सोलापूर – अक्कलकोट महामार्गावरील लिंबीचिंचोळी गावाच्या परिसरात आज सोमवारी पहाटे पाच वाजण्याच्या सुमारास कर्नाटक राज्यातील खासगी बस उलटून अपघात झाला. यात एक ठार तर सहा प्रवासी जखमी झाल्याची प्राथमिक माहिती वळसंग पोलिसांनी दिली. One killed, six injured after Aram bus overturns in Valsang area, Akkalkot road, Solapur

अपघातात चालकाचा जागीच मृत्यू झाला आहे. तर सहा जण जखमी झाले आहेत. मो. नासिर शेख (वय 58, रा. गुलबर्गा) असे मयत चालकाचे नाव आहे. लिंगम्मा मल्लम्मा पुजारी (वय 54, रायचूर, कर्नाटक), रुकमा शेख (वय 77, मुंबई), अमरीश कोडी (वय 37, गुलबर्गा) सतीश कुमार (वय 39, यादगिर), राजाराम कष्टे (वय 65 आळंद, कर्नाटक), अनिल राठोड (वय 22, शहापूर, यादगिर) असे जखमी प्रवाशांची नावे आहेत. बसमधील जखमींना तत्काळ शासकीय रुग्णालयात उपचारासाठी दाखल करण्यात आले आहे.

अक्कलकोट येथील श्री स्वामी समर्थ महाराजांचे दर्शन घेऊन कर्नाटकातील भाविक पहाटेच्या सुमारास सोलापूरकडे येत होते. वळसंग गावाहून लिंबीचिंचोळी हद्दीत गाडी येत असताना पुलावरील डिव्हायडरवर चढल्याने अपघात झाला. याचवेळी चालकाचा ताबा सुटल्याने हा अपघात झाल्याची प्राथमिक माहिती आहे. या अपघातानंतर वळसंग पोलिस ठाण्याकडील अधिकारी व कर्मचारी घटनास्थळी दाखल झाले होते. बसमधील जखमींना उपचारासाठी शासकीय रूग्णालयात दाखल केले.

स्थानिक, देशासह जगभरातल्या बातम्या वाचण्यासाठी ‘सुराज्य डिजिटल’ फेसबुक पेज, ट्विटर, कू ॲपवर आणि ‘टेलिग्राम’वर आवर्जून द्या भेट…(बातमीसाठी मोबाईल – 9881192310 व्हाटसअपवर संपर्क करा)

□ तेजस कांबळे याच्यावर तडीपारीची कारवाई

सोलापूर :  आगामी काळातील सण-उत्सव, मिरवणुका व महानगरपालिका निवडणूकच्या दरम्यान शहरात कोणताही  अनुचित प्रकार घडू नये म्हणून शहरात कायदा व सुव्यवस्था तसेच शांतता अबाधित राहण्याच्या अनुषंगाने सोलापूर शहर पोलीस आयुक्तालय अंतर्गत विजापूर नाका पोलीस स्टेशन हद्दीत घरफोडी व चोरी करणारा सराईत गुन्हेगार तेजस धर्मपाल कांबळे (वय-२१,रा.घ.नं.७५,गोकूळ नगर,जुळे सोलापूर) यास दोन वर्ष तीन जिल्ह्यातून तडीपार करण्यात आले आहे.

विजापूर नाका पोलीस ठाणेच्या हद्दीत घरफोडी चोरी करणे अशा प्रकारचे गंभीर स्वरूपाचे एकुण ०६ गुन्हे त्याच्यावर दाखल आहे.  त्यामुळे त्याच्यावर शुक्रवारी  (ता. ९ सप्टेंबर)  विजापुर नाका पोलीस स्टेशन कडून ताब्यात घेवून, सोलापूर शहर व जिल्हा, उस्मानाबाद जिल्हा तसेच पुणे जिल्ह्यातील  इंदापूर तालुक्यातून दोन वर्षाकरीता तडीपार करण्यात आले आहे.